KSHH

TEL/FAX

++355(4)233671

MISIONI I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Qëllimi i projektit

Qëllimi i këtij projekti ishte sensibilizimi dhe edukimi i të rinjve dhe nxitja e respektimit më të mirë të të drejtave të të rinjve nëpërmjet vetëpjesëmarrjes së tyre.

 Objektivat me konkretë të projektit ishin:

·        Ndihmesa në edukimin me ligjin të të rinjve të shkollave të mesme, kryesisht të zonave rurale.

·        Ndërgjegjësimi i të rinjve për të drejtat dhe detyrimet e tyre në procesin e demokratizimit të Shqipërisë.

·        Informimi më i mirë i të rinjve për mjetet e realizimit të të drejtave të tyre dhe rivendosjes së të drejtave të shkelura.

·        Motivimi më i mirë i të rinjve si veprimtarë në procesin e edukimit ligjor të tyre dhe i moshatarëve në komunitetin e tyre.

·        Trajnimi i mësuesve për ligjin dhe mjetet e mbrojtjes së tij, si bazë për promovimin dhe mbrojtjen e të drejtave të të rinjve nëpërmjet gjithëpërfshirjes së  vetë shkollës.

·        Pajisja e të rinjve me njohuri praktike për të realizuar të drejtat e tyre, por edhe për të ndërtuar ura bashkëpunimi ndërmjet tyre, shkollës dhe komunitetit ku ata jetojnë dhe mësojnë.

·        Rritja e shkallës së përfshirjes së të rinjve në nevojë ose që nuk kishin marrë pjesë në veprimtari të tilla më parë.

 Grupet synuese të këtij projekti kanë qenë:

a)      të rinjtë dhe nxënësit e shkollave të mesme  në disa zona të vendit,

b)      mësuesit dhe inspektorët e lëndëve shoqërore të shkollave ku u zhvilluan veprimtaritë dhe

c)      në mënyrë të tërthortë, komuniteti ku jetojnë këta të rinj.

 Veprimtaritë e zhvilluara në kuadër të projektit gjatë vitit 2002

-         Studim vlerësues i gjendjes së të drejtave të fëmijëve dhe informimi i të rinjve në shkollat e mesme të Tiranës për të drejtat e tyre. (Studimi u krye në 27 shkolla të rrethit Tiranë)

-         Seminare trajnuese me përfaqësues të qeverive të nxënësve në disa shkolla të mesme të Tiranës. Në këtë veprimtari u përfshinë shkollat e mesme të përgjithshme “Ahmet Gashi”, “Myslim Keta”, “Arben Broci”, ‘Abdulla Keta”, “Petro Nini Luarasi” dhe shkollat e mesme të zonave periferike të Tiranës, si në Yzberisht, Katundi i Ri, Kamëz dhe Vorë.

-         Aktivitete njohëse dhe edukuese në kuadër të 10 Majit, Ditës Kombëtare të Drejtësisë. (Në gjykatën e Tiranës).

-         Realizimi i një emisioni në Radio Tirana për të informuar të rinjtë për ligjin dhe Ditës së Drejtësisë.

-         Organizimi i një shkollë verore në shkollën e mesme të bashkuar “Yzberisht”, Tiranë (25-26 korrik 2002)

-         Takime me qeveritë e nxënësve, me mësuesit e shkollave të mesme të Tiranës, të Korçës dhe të Fierit, me drejtoritë arsimore të rretheve përkatëse.

-         Pasurimi i bibliotekave të shkollave të përfshira në projekt me publikime të të drejtave të njeriut dhe libra të tjerë për të rinjtë.

-         Përgatitja e tri publikimeve informuese: “Të rinjtë- a dinë ata gjithçka?”,  “Mirë se vini në sistemin gjyqësor shqiptar”  dhe “Për një njohje më të mirë të të drejtave tona dhe institucioneve demokratike”, dhe materialeve trajnuese për mësuesit dhe të rinjtë.

Rezultatet e arritura nga veprimtaritë e mësipërme

1.         150 nxënës të shkollave të mesme të Tiranës dhe mësuesit të tyre patën mundësinë të marrin pjesë në një takim, në të cilin përfaqësues të policisë, gjyqtarë, juristë, pedagogë të Fakultetit të Drejtësisë bashkëbiseduan për sistemin e drejtësisë, funksionimin e saj si dhe për raportet e të rinjve me gjykatat.

2.         U informuan dëgjuesit, veçanërisht të rinjtë, për Ditën Kombëtare të Drejtësisë, historikun dhe funksionimin e sistemit të drejtësisë në Shqipëri dhe mundësitë që ligji u jep shtetasve  për të kontaktuar me ligjin.

3.         U organizuan për herë të parë  aktivitete argëtuese dhe edukuese me 50 fëmijë, kryesisht të grup-moshës 14-16 vjeç të zonës së Yzberishtit.

4.         U vendosën ura komunikimi ndërmjet të rinjve, komunitetit dhe punonjësve të policisë së zonës ku ata banojnë.

5.         Shkolla verore, duke qenë aktiviteti i parë i organizuar në këtë shkollë, u dha mundësi të rinjve të njihnin kapacitetet e shumta të tyre në vetorganizimin e veprimtarive edukuese. Ndërmjet tyre dhe punonjësve të policisë për herë të parë u thye akulli dhe u mundësua dëgjimi i shqetësimeve të tyre dhe vënia në rrugën e zgjidhjes.

6.         U nxit një orë model e mësimit të edukimit ligjor të të rinjve.

7.         U përfshinë në studim 27 shkolla.

8.         U trajnuan 360 nxënës, përfaqësues të qeverive të nxënësve dhe përfaqësues të 9 shkollave të Tiranës dhe të periferisë së saj.