Komiteti Shqiptar i Helsinkit

 

Zgjedhjet, policia dhe vëzhgimi i tyre Me qëllim të përmirësimit të rolit të policisë gjatë procesit zgjedhor dhe ditën e zgjedhjeve, për të kontribuar në zhvillimin e zgjedhjeve të qeta, të lira dhe demokratike, në 23-25 shtator 2003 Drejtoria e Përgjithshme e Policisë së Shtetit, në bashkëpunim me Komitetin Shqiptar të Helsinkit, zhvilluan një seminar trajnues me përfaqësues të nivelit të lartë të Ministrisë së Rendit Publik, si edhe shefat e komisariateve dhe të rendit të të gjithë vendit. Qëllimi i seminarit ishte njohja më e mirë e nga ana e Policisë së akteve ligjore dhe nënligjore që rregullojnë rolin e policisë në procesin zgjedhor, menaxhimi i tubimeve, roli i policisë në ditën e votimit, etj.  Tema të tilla trajnuese u zhvilluan nga specialistë të Policisë së Shtetit.  Komiteti Shqiptar i Helsinkit ofroi trajnim për një njohje dhe kuptim më të mirë të Kodit Zgjedhor dhe të përmbushjes nga ana e policisë të së drejtës për të votuar dhe detyrimin që u ngarkon ligji në këtë proces. Përfaqësues të Ministrisë së Rendit Publik, Komisionit Qëndror të Zgjedhjeve, Komitetit Shqiptar të Helsinkit, Drejtorisë së Policisë së Shtetit, Komisionit Parlamentar për Rendin dhe SHISH-in, si edhe përfaqësues nga forcat e huaja policore diskutuan rreth rolit dhe rëndësisë së veçantë së Policisë së Shtetit si një strukturë e depolitizuar, në mbarëvajtjen e një procesi zgjedhor të lirë, të ndershëm dhe demokratik. Ky aktivitet u zhvillua në kuadër të projektit "Edukimi ligjor i zgjedhësve dhe vëzhgimi i zgjedhjeve për organet e Qeverisjes Vendore 2003", i mbështetur nga Komisioni për Demokraci i Ambasadës Amerikane në Tiranë.