KSHH adreson KQZ-në mbi disa çështje mbi Kodin Zgjedhor dhe disa aspekte të procesit zgjedhor

Në kuadër të projektit të vëzhgimit të zgjedhjeve për organet e qeverisjes vendore 2003, KSHH ka mbajtur kontakte të vazhdueshme me Komisionin Qëndror tëZgjedhjeve (KQZ) dhe gjatë gjithë kësaj periudhe ka pasur një komunikim konstruktiv me këtë organ në lidhje me aspekte të ndryshme të procesit zgjedhor të cilat po i paraqesim shkurtimisht si më poshtë.

KSHH paraqiti kërkesën me shkrim KQZ-së në lidhje me akreditimin e 106 vëzhguesve të KSHH-së të cilët pas akreditimit nga KQZ filluan punën e tyre vëzhguese në Korçë, Elbasan, Vlorë, Fier, Kukës, Durrës, Gjirokastër, Shkodër dhe Tiranë.

Më datën 02.09.2003 KSHH i drejtohet KQZ mbi moszbatimin e Kodit Zgjedhor nga ana e partive politike lidhur me fillimin e parakohshëm të fushatës zgjedhore.

Më datën 12.09.2003, KSHH ngre shqetësimin e tij në lidhje me ndryshimet që KQZ, I ka bërë udh:ezimeve të tij lidhur me dokumentat që duhen të paraqiten nga subjektet politike në rastet e regjistrimit të gabuar të zgjedhësve (Udhëzimit nr. 5 datë 03.09.2003). KSHH në letrën e tij zyrtare thekson se ky ndryshim mund të çojë në zvarritje të mundshme.

Më datën 17.09.2003, nëpërmjet një tjetër letre zyrtare drejtuar KQZ-së, KSHH vë në dukje parregullsi të ndryshme në lidhje me afishimin e listave paraprake të zgjedhësve dhe i bën thirrje organeve përkatëse të marrin të gjitha masat për të mirëmanaxhuar këtë proces i cili përbën një nga aspektet më të rëndësishëm të procesit zgjedhor.

Më datën 18. 09.2003, KSHH i paraqet KQZ-së sugjerimet e tij konstruktive në lidhje me udhëzimin 7 dt. 13.09.2003 dhe udhëzimin nr. 8 dt. 15.09.2003 të KQZ. Lidhur me udhëzimin nr. 7 dt. 13.09.2003 të KQZ bëhet fjalë për sekretarët e KQV-ve dhe personave që për shkak të detyrës janë pajisur me armë. Në këtë udhëzim bëhet fjalë edhe për zëvendësimin e vendit vakant në KQV ditën e zgjedhjeve. KSHH për të tre çështjet e mësipërme i ka sugjeruar KQZ të rishikojë vendimet e mësipërme sepse nuk janë në përputhje me ligjin. Lidhur me  udhëzimin nr. 8 dt. 15.09.2003 të KQZ ku bëhet fjalë për procedurat ankimore administrative KSHH i ka sugjeruar KQZ që ajo që shprehimisht thuhet në ligj nuk del nevoja të përsëritet në udhëzim.

Të mos pengohet propaganda zgjedhore

Në shtypin e djeshëm, u njoftua se mbështetësit e kandidatit të Partisë Demokratike Reformatore për Bashkinë e Durrësit, Ferdinand Xhaferri, në momentin kur ishin duke ngjitur postera të këtij kandidati u kërcënuan nga Krenar Koka, vëllai i kandidatit të PS-së, për kryetar të Bashkisë së Durrësit. Thuhet se për këtë është bërë edhe kallëzimi përkatës për ndjekje penale.

KSHH dhe pse nuk paragjykon zhvillimin e ngjarjes të pretenduar, fakt i cili do të sqarohet nga organet kompetente, e shikon të nevojshme të tërheqë vëmëndjen për të drejtën që ka subjekti zgjedhor që të bëjë propagandë zgjedhore në çdo mënyrë të ligjshme pa u penguar dhe pa u kërcënuar nga askush. Në këtë vështrim dhe në zbatim të nenit 135 të Kodit Zgjedhor, organet e qeverisjes vendore janë të detyruara të caktojnë në mënyrë të drejtë dhe të paanshme vëndet publike për afishimin e materialeve propagandistike.

KSHH sjell në vëmëndjen e organeve të mësipërme faktin se në zgjedhjet e kaluara pikërisht për moszbatimin me korrektesë të kësaj dispozite, ka patur ankesa sidomos nga partitë e vogla.
KSHH ka parasysh se në zgjedhjet e organeve të qeverisjes vendore të këtij viti figurojnë të regjistruara si subjekte zgjedhore 50 parti politike. Të gjitha këto kanë të drejtë të zhvillojnë fushatën e tyre zgjedhore, ndërsa organet e qeverisjes vendore duhet ti krijojnë atyre mundësinë e afishimit në vënde të caktuara të materialeve të tyre propagandistike.

Me këtë rast i sugjerojmë KQZ-së që nëpërmjet strukturave të saj të ndjekë dhe të kontrollojë edhe zbatimin e dispozitave që kanë të bëjnë me periudhën e fushatës zgjedhore.

Tiranë, 15 shtator 2003