Deklarate e Komitetit Shqiptar te Helsinkit

 

Votuesve shqiptarë!  Ushtroni të drejtën tuaj të votës!  Thirrje e Komitetit Shqiptar të Helsinkit   Në 12 Tetor 2003 do të zhvillohen zgjedhjet për organet e qeverisjes vendore në gjithë vendin. Kjo është një ngjarje e rëndësishme për të gjithë shoqërinë shqiptare që synon të integrohet në familjen evropiane.   Komiteti Shqipar i Helsinkit, organizata e parë joqeveritare dhe jopartiake, anëtare e Federatës Ndërkombëtare të Helsinkit, vëzhguese edhe në zgjedhjet e mëparshme, u bën thirrje të gjithë zgjedhësve, pavarësisht nga bindjet e tyre politike, simpatitë ose përkatësitë partiake, që në 12 Tetor 2003 të ushtrojnë të drejtën e votës duke shprehur kështu vullnetin e tyre të lirë për alternativën që ata dëshirojnë.   KSHH-ja, pjesëmarrjen e çdo votuesi në zgjedhje e konsideron një element të rëndësishëm emancipues që shpreh pjekurinë e zgjedhësve si dhe pjesëmarrjen active të tyre në drejtim të forcimit të demokracisë, të rritjes dhe pjesëmarrjes së tyre në qeverisjen e vendit. Gjithë shoqëria shqiptare dhe partitë politike, si bartëse e opinioneve të veçanta në gjirin e kësaj shoqërie, janë tërësisht të interesuara për një pjesëmarrje sa më të gjerë në këto zgjedhje.   Zhvillimi demokratik i Shqipërisë është në proces. Ai është sa i rëndësishëm aq edhe kompleks. Zgjedhjet periodike parlamentare dhe ato të qeverisjes vendore synojnë thellimin e mëtejshëm të këtij procesi për integrimin e vendit tonë në organizmat euro-atlantike. Organet që do të dalin nga zgjedhjet e 12 Tetorit të këtij viti në kushtet e decentralizimit dhe të autonomisë lokale, do të ndjejnë përgjegjësi më të madhe ndaj shtetasve të tyre.   KSHH-ja u bën thirrje me këtë rast, jo vetëm zgjedhësve, por edhe të gjitha forcave politike që të kontribuojnë në realizimin e zgjedhjeve të lira, të ndershme, demokratike dhe të pakontestueshme. KSHH-ja u bën thirrje gjithashtu anëtarëve të KQV-ve, që në kryerjen e detyrës së tyre sa të rëndësishme, aq edhe delikate, autoritetin më të lartë të konsiderojnë ligjin dhe vetëm ligjin. KSHH shpreh bindjen se gjatë këtij procesi të rëndësishëm zgjedhor, forcat politike do të lënë mënjanë interesat e ngushta dhe pasionet partiake dhe do të respektojnë vetëm Kushtetutën e Republikës së Shqipërisë dhe ligjin. Atmosfera e qetë do të ndikojë pozitivisht në shprehjen e lirë të vullnetit të zgjedhësve.   Për më shumë informacione mund të kontaktoni:   Komiteti Shqiptar të Helsinkit Tel/fax: 04 23 36 71 E-mail: office@ahc.org.al Web:     www.ahc.org.al   Tiranë, më 9 Tetor 2003