Komiteti Shqiptar i Helsinkit

 

Projekt-ndryshimet e Kodit Zgjedhor kërkojnë debat   14.10.2004 Komiteti Shqiptar i Helsinkit edhe më parë ka evidentuar faktin se mjaft të meta në Kodin Zgjedhor në fuqi u lejuan sepse projekti nuk u bë objekt diskutimi dhe debati në rrethe të gjera të specialistëve dhe të njerëzve me përvojë në këtë fushë.   KSHH-ja shpreh shqetësimin e tij se si pasojë e vonesave të theksuara në hartimin e projekt-ndryshimeve të Kodit të mësipërm, mund të përsëritet i njëjti fenomen negativ.   KSHH–ja, pa paragjykuar kontributin e ekspertëve të OSBE-së dhe as shqyrtimin serioz që mund t’i bëhet këtij projekti nga komisionet parlamentare përkatëse mendon se ai duhet t’i nënshtrohet një diskutimi më të gjerë para se të miratohet nga Kuvendi i Republikës së Shqipërisë.   KSHH-ja ka parasysh numrin e madh të rekomandimeve të OSBE/ODIHR-it dhe të Komisionit të Venecias dhe veçanërisht rëndësinë e tyre për të arritur zgjedhje të lira, të ndershme dhe demokratike. Megjithatë, KSHH-ja mendon se vëmendje e veçantë i duhet kushtuar aspektit ligjor dhe kushtetues të ndryshimeve, sidomos në drejtim të formulimeve të sakta dhe të plota të dispozitave të këtij projekti.   KSHH-ja e shikon të nevojshme të theksojë se vonesat e deritanishme për shkak të mungesës së vullnetit politik, me justitifikimin se “koha nuk pret”, mund të çojë në nënvleftësimin ose anashkalimin e debatit të sipërpërmendur duke e dërguar projektin për miratim drejtpërsëdrejti në Kuvend, madje me kërkesën për shqyrtim me procedurë të përshpejtuar.   Në rastin konkret, kjo praktikë formalisht e përligjur mund të shoqërohet me pasoja të dëmshme në aspekte të ndryshme të procesit zgjedhor.   Është pikërisht kjo arsyeja që KSHH-ja sugjeron që projektligji për ndryshimet në Kodin Zgjedhor t’i dërgohet për miratim Kuvendit, pasi të jetë siguruar edhe oponenca konstruktive që do të kontribuonte në përmirësimin e mëtejshëm të këtij projekti.