Komiteti Shqiptar i Helsinkit

 

Zgjedhje të lira dhe të ndershme kur ka vullnet politik dhe zbatim të ligjit     Komiteti Shqiptar i Helsinkit (KSHH) mëse një herë ka shprehur publikisht shqetësimin e vet për mosngritjen në kohë të Komisioneve të Zonave Zgjedhore (KZZ-ve) dhe për pasojat që mund të vinin për shkak të kësaj vonese. Sipas pikës 4 të nenit 34 të Kodit Zgjedhor, KZZ-të duhet të ishin ngritur jo më vonë se 6 muaj para përfundimit të mandatit të Kuvendit, d.m.th. jo më vonë se data 3 Mars 2005.   Sipas njoftimeve të KQZ-së, megjithëse kanë kaluar 75 ditë nga afati i mësipërm ato janë ngritur vetëm pjesërisht, madje edhe në mbledhjen e parë të tyre u vërtetuan mungesa të theksuara.   KSHH mendon se për këtë zvarritje janë përgjegjëse partitë përkatëse politike që kanë të drejtën e propozimeve për paraqitjen e anëtarëve që do të formonin KZZ-të.   KSHH i sugjeron KQZ-së të mos qëndrojë në pritmëri të propozimeve, por të zbatojë pikën 6 të nenit 34 të Kodit Zgjedhor ku thuhet se: “Nëse partitë politike të shumicës parlamentare dhe të opozitës parlamentare që kanë të drejtë të paraqesin kandidatura për KZZ-të nuk e ushtrojnë këtë të drejtë në afatin e përcaktuar në pikën 1 të këtij neni, kjo e drejtë u kalon automatikisht partive që vijnë në radhë me numër votash në Kuvend pas të parave, brenda grupimit përkatës. Kur kjo nuk është e mundur, propozimet bëhen sipas pikës 2 të këtij neni”.   KSHH rithekson edhe një herë shqetësimin e vet se veprimtaria e KZZ-ve është e një rëndësie të veçantë. Si rrjedhim trajnimi i tyre i vonuar, formal dhe jo cilësor mund të ndikojë negativisht në kryerjen e detyrave të tyre të përcaktuar në ligj.   KSHH shpreh bindjen se mundësitë për zgjedhje të lira, të ndershme dhe të pakontestueshme ekzistojnë, por për këtë është i nevojshëm vullneti politik dhe zbatimi rigoroz i dispozitave të Kodit zgjedhor. Zbatimi i Kodit Zgjedhor është i detyrueshëm edhe për subjektet zgjedhore.