Komiteti Shqiptar i Helsinkit

 

Letër drejtuar Kryetarit të Kuvendit të Shqipërisë    Drejtuar:       Z. Servet Pëllumbi                         Kryetar i Kuvendit të Shqipërisë                         Kuvendi i Shqipërisë   Nga:                Komiteti Shqiptar i Helsinkit                         Qendra për Nisma Ligjore Qytetare                         Qendra për Studime Parlamentare                         Shoqata për Kulturë Demokratike                         Qendra Shqiptare për të Drejtat e Njeriut     Lënda: Propozim për ndryshimin e nenit 95/2 të Kodit Zgjedhor   Tiranë, më 3 Mars 2005     I nderuar Z. Pëllumbi,   Komiteti Shqiptar i Helsinkit në datën 2 Mars 2005, organizoi një tryezë të rrumbullakët me përfaqësues të OJF-ve, të disa institucioneve shtetërore si edhe me specialistë të fushave të ndryshme. Qëllimi i kësaj tryeze ishte njohja e disa prej ndryshimeve që i janë bërë Kodit Zgjedhor me ligjin Nr. 9341, datë 10.1.2005.   Në këtë takim disa përfaqësues të OJF-ve shprehën shqetësimin lidhur me përmbajtjen e nenit 95/2 të Kodit Zgjedhor, ku bëhet fjalë për ngritjen e grupeve të numërimit të votave. Në këtë dispozitë thuhet: “Për numërimin e votave në rang njësie zgjedhore, me vendim të KZZ-së ose KZQV-ve, jo më vonë se dy orë para mbylljes së votimit … caktohen deri në 5 grupe numërimi dhe një sekretar për secilin”. Në po këtë dispozitë theksohet se: “Kryetari, zëvendëskryetari, anëtarët dhe sekretari i grupit të numërimit caktohen sipas procedurave dhe kritereve të përcaktuara për KZZ-të…”.   Përfaqësuesit e OJF-ve të pranishme në këtë tryezë mbasi e diskutuan këtë çështje vendosën t’i drejtohen Kuvendit të Shqipërisë me sugjerimin për ndryshimin e nenit 95/2 të Kodit Zgjedhor duke parashtruar argumentat e mëposhtme:   Nëqoftëse grupet e numërimit të votave do të ngrihen jo më vonë se dy orë para mbylljes së votimit (ashtu siç parashikohet në ligj) trajnimi i anëtarëve do të ishte tepër i vështirë për të mos thënë i pamundur ose do të kryehej një trajnim formal dhe jo cilësor, gjë që do të shoqërohej me pasoja të dëmshme.   Ligjvënësi nuk ka parashikuar asnjë afat deri kur partitë politike përkatëse duhet të bëjnë propozimet për anëtarë të këtyre grupeve. Vlen të përmendet se nëqoftëse çdo KZZ do të caktonte 5 grupe plus sekretarin e këtij grupi del që për 100 zonat do të duhen 4000 persona. Në këtë drejtim, edhe në këto zgjedhje kemi përvojë negative. Kështu, në ligj thuhet se KZZ-të ngrihen jo më vonë se data 3 Mars 2005, ndërsa në fakt deri më sot partitë nuk kanë paraqitur propozimet e tyre.   Grupet e numërimit të votave ngrihen sipas procedurave dhe kritereve të përcaktuar për KZZ-të që parashikohen në nenet 34, 34/1 dhe 34/2 të Kodit Zgjedhor, ndërsa KQZ-ja siç përmendet në pikën 5 të nenit 34 të Kodit, emëron anëtarët e KZZ-ve jo më vonë se 15 ditë nga paraqitja e propozimeve kur konstaton se ato janë në përputhje me dispozitat përkatëse të Kodit Zgjedhor. Në këtë vështrim, jemi të shqetësuar edhe për faktin se KZZ-të nuk do të kenë mundësi të verifikojnë nëse anëtarët e grupeve të numërimit të votave dhe sekretarët e tyre i plotësojnë ose jo kriteret dhe kushtet e parashikuara në dispozitat e mësipërme. Mungesa e një verifikimi të tillë mund të shoqërohet gjthashtu me pasoja të dëmshme.   Janë pikërisht arsyet e mësipërme që përfaqësuesit e disa OJF-ve e panë të arsyeshme t’i drejtohen Kuvendit të Shqipërisë që të shqyrtojë mundësinë e ndryshimit të pikës 1 të nenit 95 të Kodit Zgjedhor si më poshtë: “Me numërimin e votave në rang njësie zgjedhore me vendim të KZZ-së ose KZQV-së caktohen deri në 5 grupe numërimi me shtatë anëtarë dhe një sekretar secili. Çdo grup numërimi numëron votat e të paktën 3 qendrave të votimit. Propozimet për anëtarë të grupeve nga partitë politike përkatëse bëhen jo më vonë se 40 ditë para ditës së zgjedhjeve, ndërsa vendimi për caktimin e tyre, KZZ-të e marrin brenda 10 ditëve nga paraqitja e propozimeve”.   Nisur nga dëshira për mbarëvatjen e procesit zgjedhor duke e konsideruar numërimin e votave si një moment mjaft të rëndësishëm dhe delikat, shprehim paraprakisht besimin se sugjerimi ynë do të bëhet objekt shqyrtimi.       Me respekt të veçantë:   Komiteti Shqiptar i Helsinkit Qendra për Nisma Ligjore Qytetare          Qendra për Studime Parlamentare Shoqata për Kulturë Demokratike Qendra Shqiptare për të Drejtat e Njeriut