Komiteti Shqiptar i Helsinkit

 

Tensionimi i situatës nuk i shërben standarteve që kërkohen   20.06.2005 Komiteti Shqiptar i Helsinkit ka përshëndetur angazhimin e forcave politike që në procesin zgjedhor të 3 korrikut të këtij viti, të respektojnë Kodin e etikës zgjedhore të pranuar nga të gjitha palët. KSHH mendon se kjo nismë është e nevojshme, sidomos në kushtet e vëndit tonë, ku polarizimi i tejskajshëm politik, herë pas here është shoqëruar me fenomene negative që veç të tjerave, deri në një farë mase ka cënuar dhe imazhin e Shqipërisë. Kjo marrëveshje ishte gjithashtu e nevojshme edhe për faktin se këto zgjedhje do të tregojnë se sa të pregatitur jemi ne, për të ecur me hapa më të shpejta drejt integrimit në strukturave euroatlantike.   KSHH, konstatoi me kënaqësi se fillimisht, fushata zgjedhore ishte relativisht e ekuilibruar, sepse subjektet zgjedhore synuan kryesisht të shpalosin para zgjedhësve alternativat e tyre. E njëjta gjë mund të thuhet edhe për disa debate televizive të organizuara me kandidatë të pozitës dhe të opozitës.   Por KSHH me keqardhje vëren gjithashtu se me afrimin e datës të zgjedhjeve, disa subjekte zgjedhore nuk kanë patur parasysh përmbajtjen e nenit 134 të Kodit zgjedhor që nga një anë garanton të drejtën për të bërë propagandë zgjedhore, nga ana tjetër kërkon që ajo të jetë e ligjshme, pa folur pastaj për normat e etikës zgjedhore, që siç dihet janë elementë përbërës të kulturës demokratike.   Për KSHH-në është e qartë se fushata zgjedhore për vetë natyrën dhe synimet e saj është një garë që vështirë të zhvillohet si në vaj.   Megjithëkëtë, ne mendojmë se gjuha e urrejtjes, fyerjet e personalizuara që prekin dinjitetin e njeriut si dhe akuzat e ndërsjellta ligjërisht të pavërtetuara cënojnë frymën e ligjit dhe të kodit të etikës zgjedhore.   KSHH pikërisht për këtë arsye i bën thirrje subjekteve zgjedhore dhe sidomos dy partive më të mëdha që në këto pak ditë që na ndajnë nga zgjedhjet e 3 korrikut, me sjelljet qëndrimet dhe deklaratat e tyre të mos i japin shkas acarimit të atmosferës politike në vend sepse kjo nuk do të shërbente zgjedhjeve të lira, të ndershme dhe të pakonstetuara.   Zgjedhësit janë të vëmendshëm ndërsa partitë politike janë në provë.