Komiteti Shqiptar i Helsinkit

 

Thirrje e Komitetit Shqiptar të Helsinkit   Të nderuar zgjedhës,   Në 3 Korrik 2005 në vendin tonë zhvillohen zgjedhjet për Kuvendin e Republikës së Shqipërisë.   Kushtetuta e Republikës së Shqipërisë u garanton shtetasve të drejtën e zgjedhjes. KSHH, organizata e parë jo-qeveritare misioni i së cilës ka qenë dhe mbetet mbrojtja e lirive dhe të drejtave të shtetasve, duke patur parasysh se zgjedhjet periodike janë faktorë të rëndësishëm në drejtim të thellimit të mëtejshëm të reformave demokratike, i bën thirrje të gjithë zgjedhësve që në 3 Korrik të këtij viti të ushtrojnë një nga të drejtat themelore, atë të votimit.   Kjo është ngjarje e një rëndësie të veçantë. Për një periudhë 4 vjeçare, ne do të zgjedhim Kuvendin e ri të Shqipërisë, përfaqësuesit tanë më të lartë legjislativë.   Kjo është gjithashtu një ngjarje e rëndësishme edhe për faktin se Europa dhe SH.B.A. kërkojnë nga qeveria dhe klasa politike shqiptare që zgjedhjet e këtij viti të jenë të lira, të ndershme dhe të pakontestuara.   Pikërisht, për arsyet e mësipërme, Komiteti Shqiptar i Helsinkit u bën thirrje të gjithë zgjedhësve që të marrin pjesë në këto zgjedhje dhe të votojnë lirisht për subjektin zgjedhor që ata dëshirojnë.   Pjesëmarrja sa më e gjerë në votime do të tregojë pjekurinë e popullit tonë edhe për faktin se këto zgjedhje do të jenë një test për integrimin e Shqipërisë në strukturat euro-atlantike.   KSHH u bën thirrje edhe zgjedhëse që nuk figurojnë në listat përfundimtare, që t’i drejtohen gjykatës së rrethit gjyqësor dhe të kërkojnë që ajo të marrë vendim për të lejuar që ata të votojnë në qendrën e tyre të votimit. Mos ngurroni ta bëni këtë, ka ende kohë.     Të nderuar zgjedhës!   Ligji ju garanton votën e lirë dhe të fshehtë. Denonconi rastet e premtimeve ose kanosjeve me synimin  që ju të votoni pro ose kundër një kandidati ose subjekti zgjedhor.   Ruajeni fshehtësinë e votës suaj dhe mos lejoni futjen familjarisht në dhomën e fshehtë.   Në qoftë se nuk keni mundësi të votoni vetë, zgjidhni për t’ju ndihmuar një person tjetër, banor i qendrës suaj të votimit që ashtu sikurse ju, figuron në listën e zgjedhësve.   Tregoni kujdes në momentin kur votoni.   Që vota juaj të mos quhet e pavlefshme, vendoseni shenjën brenda kuadrit të caktuar.   KSHH uron me këtë rast të gjithë zgjedhësit, si edhe emigrantët që janë kthyer në vendin e tyre për të votuar, që nëpërmjet votës së lirë dhe të ndershme të kontribuojnë për një jetë më të mirë, për konsolidimin e demokracisë dhe institucioneve të saj në Shqipëri.