Komiteti Shqiptar i Helsinkit

 

KZZ-të a do ngrihen në 3 Mars 2005?!   Komiteti Shqiptar i Helsinkit (KSHH) si një nga organizatat monitoruese të zgjedhjeve periodike në Shqipëri, ndjek me vëmendje edhe përgatitjet për zgjedhjet parlamentare të këtij viti.   KSHH shpreh veçanërisht shqetësimin e tij që Kuvendi i Shqipërisë nuk ka miratuar ende ndarjen e zonave zgjedhore. Si rrjedhim, që tani është vështirësuar dhe ndoshta është bërë e pamundur ngritja në afatin e caktuar ligjor të komisioneve të zonave zgjedhore (KZZ-ve) që sipas nenit 34 të Kodit Zgjedhor duhet të ngrihen jo më vonë se 6 muaj para mbarimit të mandatit të Kuvendit” d.m.th. në 3 Mars 2005.   Deri në 3 Mars 2005 mbeten 14 ditë. Projektligji për ndarjen e zonave zgjedhore nuk i është paraqitur ende Kuvendit të Shqipërisë. KSHH mendon se edhe sikur ky ligj të miratohet nga Kuvendi me procedure të shpejtuar, afati ligjor për ngritjen e komisioneve të zonave zgjedhore do të shkelet.   Komiteti Shqiptar i Helsinkit arrin në këtë përfundim duke u bazuar në argumentat e mëposhtëm:   Së pari, komsioni i Zonës Zgjedhore emërohet nga Komisioni Qëndror i Zgjedhjeve në bazë të propozimeve që do të paraqesin partitë politike përkatëse. Partitë politike duhet të kenë parasysh papajtueshmërinë dhe kushtet ligjore që kërkon ligji për të qenë anëtar dhe sekretar i KZZ-së (nenet 34/1 dhe 34/2 të Kodit Zgjedhor;   Së dyti, KQZ-ja emëron anëtarët e KZZ-së jo më vonë se 15 ditë nga paraqitja e propozimeve, kur konstaton se propozimi është në përputhje me kërkesat e ligjit.    Së treti, brenda 15 ditëve nga paraqitja e porpozimeve, KQZ-ja duhet të verifikojë një e nga një 700 anëtarë dhe 100 sekretarët e KZZ-ve.   Çdo formalizëm ose nxitim i tepruar në këtë drejtim mund të lejonte emërime në kundërshtim me dispozitat përkatëse të Kodit Zgjedhor. KSHH-ja ka parasysh gjithashtu se, sipas rekomandimit të OSBE/ODIHR-it dhe Komisionit të   Venecias, trajnimi i anëtarëve duhej të kryhej “jo më vonë se 180 ditë para zgjedhjeve” (Rekomandimet, përkthim shqip faqe 5).   Për të gjithë është e qartë se vonesa në ngritjen e KZZ-ve do të shkaktojë vonesa në trajnimin e tyre, në përfundim të të cilit, sipas rekomandimeve të mësipërme “duhet të bëhet testimi i tyre dhe ata individë që marrin një rezultat të kënaqshëm do të “çertifikohen” si administratorë të zgjedhjeve”.   Komiteti Shqiptari i Helsinkit është i mendimit se ngritja dhe trajnimi me vonesë i KZZ-ve mund të shoqërohet me pasoja të dëmshme dhe do të ndikojë negativisht në mbarëvajtjen e zgjedhjeve.   KSHH-ja mendon se realizimi i detyrës për të zhvilluar zgjedhje të lira, të ndershme dhe të pakontestueshme kërkon jo vetëm vullnet politik, por edhe zbatim rigoroz të Kodit Zgjedhor.   Është kjo arsyeja që KSHH-ja e sheh të nevojshme t’u bëjë thirrje partive politike dhe sidomos dy partive më të mëdha që në interes të vendit, të respektimit të Kushtetutës dhe të ligjit, të arrijnë konsensusin për ndarjen e zonave zgjedhore.   KSHH i sugjeron gjithashtu Kuvendit të Shqipërisë që të kërkojë paraqitjen sa më parë për miratim të projektligjit për ndarjen e zonave zgjedhore.     Tiranë, më 18 shkurt 2005