Informacion mbi monitorimet e kryera në pika kufitare

03.11.2006 

Në kuadër të projektit “Mbi respektimin e të drejtave të emigrantëve dhe të personave të kthyer”në datat 28- 30 shtator 2006 u organizuan disa vëzhgime në tre pikat kryesore të kalimit kufitar me Greqinë, përkatësisht në Pikën e Kalimit Kufitar Kapshticë, (Korçë) Tre Urat (Përmet) dhe Kakavijë (Gjirokastër).

Pasi u vëzhguan mjediset se ku priteshin dhe intervistoheshin personat e kthyer nga policia greke, përfaqësuesit e KSHH patën disa takime me drejtues të Pikave të Kalimit Kufitar.

Sipas informacioneve të marra, policia greke kthente një numër të konsiderueshëm klandestinësh shqiptarë, (çdo ditë ktheheshin mesatarisht rreth 150 persona), dhe kishte ditë që ky numër shkonte deri në 190 persona të kthyer. Të kthyerit janë me viza të skaduara ose pa viza, pothuajse të gjithë pa dokumentacion të rregullt,

Përsa i përket personave me dokumentacion të rregullt përfaqësuesit e KSHH nuk konstatuan ndonjë  problem.

Gjatë vëzhgimit u vu re një përmirësim i infrastrukturës në këto pika kufitare. Deri para rreth dy muajsh në Pikën e Kalimit Kufitar të Kapshticës, të kthyerit pasi dorëzoheshin nga policia greke mbaheshin, (madje edhe intervistoheshin) në korridoret e godinës së pikës doganore, një mjedis aspak i përshtatshëm, qoftë për pritje, e ca më pak për intervistim,ndërsa tani të kthyerit vendoseshin në mjediset e repartit të GOS (Grupi Operacional i Specializuar), vetëm pak metra larg pikës së kalimit kufitar.

Me instalimin e sistemit TIMS në pikën kufitare, policia identifikonte të gjitha të dhënat e personave të kthyer si dhe mbante shënimet përkatëse për personat që figuronin me probleme.

Në këtë mjedis, të kthyerit intervistoheshin për identitetet, rrugën e kalimit, mënyrën e kapjes nga policia greke dhe faktin nëse ishin keqtrajtuar nga kjo polici. Personat që identifikoheshin plotësisht liheshin të lirë që në këtë mjedis.

Megjithë përmirësime e bëra,në komisariatet e policisë kushtet ku mbaheshin personat e kthyer linin për të dëshiruar. Procedura parashikonte që inspektorët e këtij komisariati të lidheshin me telefon me komisariatet respektive nga ishin të kthyerit për të konfirmuar identitetet. Por ky afat i verifikimit të të dhënave linte vend për abuzim, për arsye të mosfunksionimit të shpejtë të komunikimit ndërmjet policive të rretheve të ndryshme.

Në pikat kufitare nuk kishte inspektore të policisë femra për të marrë në pyetja femrat e kthyera, të cilat mund të ishin klandestine, por mund të ishin edhe viktima të trafikut të qënieve njerëzore.

KSHH sugjeron që autoritetet e Ministrisë së Brendshme të sanksionojnë me një udhëzim të veçantë kohën e verifikimit të identiteteve të një të kthyeri nga policia,për ti prerë rrugën abuzimit, pasi të kthyerit kanë pritur në komisariat orë të tëra, (deri në dhjetë orë) konfirmimin nga komisariatet respektive.

KSHH sugjeron  gjithashtu, që të  plotësohet organika me femra për të permirësuar standartin e shërbimit.

Për më shumë rreth rezultateve të vëzhgimit mund të kontaktoni z.Andi Pipero, koordinator projekti