NJOFTIM PËR SHTYP

“Menaxhimi i Integruar i Kufijve” trajtimi i shtetasve të huaj dhe respektimi i të drejtave të njeriut”

09.10.2006 

Drejtoria e Policisë Kufitare dhe Migracionit në bashkëpunim me Komitetin Shqiptar të Helsinkit organizojnë tryezën e rrumbullakët me temë “Menaxhimi i Integruar i Kufijve” trajtimi i shtetasve të huaj dhe respektimi i të drejtave të njeriut”. Qëllimi i tryezës është të paraqesë gjendjen aktuale të menaxhimit të kufijve, problemet e ndeshura deri më sot, respektimi i të drejtave të njeriut, sfidat dhe objektivat për të ardhmen.

Në fokus të punës së policisë kufitare dhe migracionit është zbatimi i strategjisë “Për manaxhimin e integruar të kufijve” së bashku me planin e veprimit (e cila po ripunohet); përmirësimi i legjislacionit për të huajt, zbatimi i Strategjisë “Për migracionin” dhe plani i saj i veprimit, zbatimi i standarteve ndërkombëtare “Për përzgjedhjen e shtetasve të huajve” dhe zbatimi i marrëveshtjes së ripranimit të nënshkruar me Bashkimin Europian.

Krahas reformës ligjore, objekt trajtimi në tryezë janë masat e marra për krijimin e një strukture efikase dhe dhënia e një autonomie më të madhe Drejtorisë së Policisë Kufitare dhe Migracionit bazuar në rekomandimet e BE për manaxhimin e integruar të kufijve si dhe në praktikat e mira; rritja e bashkëpunimit në nivel rajonal dhe ndërkombëtar; midis strukturave vendase qëndrore dhe rajonale; krijimi i infrastrukturës së nevojshme për zbatimin e marrëveshjes së ripranimit me BE, krijimi i kushteve akomoduese në qëndrat pritëse tranzit në pikat kryesore kufitare, masat e marra për kontrollin e shtetasve të huaj në territor.

Respektimi i të drejtave dhe lirive të shtetasve shqiptarë, të huaj dhe pa shtetësi, në pikat e kalimit të kufirit, trajtimi human dhe me dinjitet i viktimave të trafikut të qënieve njerëzore është një çështje që do të diskutohet në tryezë. 

Megjithë arritjet në këtë fushë, mbetet ende për tu bërë për të përmbushur objektivat afat mesëm dhe afatgjatë për një menaxhim sa më të mirë të kufijve dhe respektimin e të drejtave të njeriut dhe sigurimin e lëvizjes së lirë të njerëzve.Monitorimi periodik i kufijve, informimi dhe sensibilizimi i shtetasve për të drejtat e tyre, rritja e kapaciteteve të personelit të policisë kufitare lidhur me trajtimin me respekt dhe dinjitet të shtetasve dhe personave të kthyer sipas marrëveshjes së ripranimit, etj,. janë elemente të rëndësishëm në punën e policisë së kufirit dhe të migracionit  dhe organizatave monitoruese të të drejtave të njeriut.