Projekti:	"Respektimi i interesit më të lartë të fëmijës - detyrim për të gjithë"
Periudha e zbatimit:	Gusht 2006  - Mars 2007
Donator:	Fondacioni Soros në bashkëpunim me Cordaid

 

                                 

KShH-ja si një organizatë me një përvojë të gjatë në fushën e mbrojtjes dhe respektimit të të drejtave të njeriut në përgjithësi dhe grupeve në nevojë në veçanti ka filluar zbatimin e projektit „Respektimi i interesit më të lartë të fëmijës – Detyrim për të gjithë”. Ky projekt mbështetet financiarisht nga Fondacioni Soros dhe Cordaid.

 

Qëllimi kryesor i projektit është kontribuimi në rritjen e kujdesit ndaj fëmijëve me qëllim parandalimin e kontakteve të tyre me sistemin gjyqësor si dhe përmirësimin e trajtimit të tyre nga ky sistem, duke u udhëhequr nga parimi i interesit më të lartë të fëmijës. Ky objektiv  do të arrihet nëpërmjet njohjes dhe sensibilizimit të të rinjve dhe të publikut për situatën e respektimit të të drejtave të të miturve në kontakt me drejtësinë penale të të miturve dhe rekomandimit të masave për përmirësimin e trajtimit të tyre.

 

Projekti është ndërtuar në dy shtylla kryesore: Shtylla e parë - Drejtësia për të mitur dhe trajtimi i të miturve autorë dhe shtylla e dytë - Lobimi pranë politikbërësve dhe vendimarrësve për një respektim më të mirë të interesit të lartë të fëmijës, duke nxitur edhe pjesëmarjen e vetë të rinjve në këtë proces dhe të medias dhe përmirësimin e legjislacionit dhe procesin e zbatimit të tij.

 

Gjatë zbatimit të këtij projekti do të bëhet një vlerësim i vendimeve gjyqësore të formës së prerë me autor të veprës penale të miturin dhe i ecurisë së procesve gjyqësore ndaj të miturve. Shtrirja kohore e vëzhgimit do te përfshijë periudhën 2005 dhe ½ e vitit 2006 si dhe të proceseve në vazhdim. Zbatimi i projektit do të shtrihet në qytetet si Tiranë, Korçë, Vlorë, Gjirokastër, Shkodër, Elbasan dhe Fier.

 

Vëzhgimi do të fokusohet në çështje të tilla si: afatet e procedimit, mbrojtja ligjore e të miturve, trajtimi i tyre në proces gjyqësor, analiza e rrethanave sociale ekonomike në të cilat ka vepruar i mituri dhe sa dhe si mbahen ato parasysh nga gjykata në dhënien e vendimit, respektimi i të drejtave të miturve për një proces të rregullt ligjor.

Në përfundim të studimit, KShH do të bëj rekomandime dhe propozime për ndërhyrje të nevojshme për të përmirësuar  trajtimin e të miturve në proces, por edhe për të sensibilizuar strukturat e tjera të shoqërisë si shkollat dhe vetë të rinjtë për të mbështetur fëmijët në nëvojë, dhe për të minimizuar sa më shumë  riskun e tyre.

 

Projekti zbatohet në përputhje me strategjinë e re të KShH-së, ku grupet në nevojë si fëmijët, grupet e komuniteteve sidomos ato rome dhe egjyptianë do të jenë në vemendje të veprimtarive të KShH-së  duke kontribuar jo vetëm në hartimin e politikave, por edhe për të lobuar për zbatimin e tyre në interes të fëmijëve dhe grupeve në nevojë.