Seminar

“Për monitorimin e zbatimit në praktikë të Strategjisë Kombëtare

të minoritetit Rom”

 

Në datën 5 Korrik 2006, Fondacioni “Shoqëria e hapur për Shqipërinë” (SOROS) në bashkëpunim me Komitetin Shqiptar i Helsinkit (KShH-së) dhe Qendrën për Mbrojtjen e të Drejtave të Fëmijëve në Shqipëri (CRCA) organizuan seminarin me temë: Paraqitja e përfundimeve të monitorimit të Strategjisë Kombëtare “Për përmirësimin e kushteve të jetesës së minoritetit Rom në Shqipëri”.

 

Në kuadër të një projekti të inicuar nga Fondacionit SOROS, ekspetë të këtij Fondacioni, të KSHH-së, dhe CRCA-së ndërmorën inisiativën të monitorojmë zbatimin e strategjisë Kombëtare “Për përmirësimin e kushteve të jetesës së minoritetit Rom në Shqipëri” dhe në përfundim të saj të paraqesin një raport për progresin e bërë gjatë periudhës 2003-2005 në drejtim të zbatimit të kësaj strategjie.

 

Monitorimi synoi analizimin e përmbushjes së objektivave dhe të masave të parashikuara në Strategji, të hapave konkretë të marra nga institucionet shtetërore, qëndrore dhe vendore dhe aktorëve të tjerë në zbatim të saj[1]. Gjithashtu, në seminar u bënë të njohura disa rekomandime për përmirësimet që duhen bërë për zbatimin me efikasitet të Strategjisë Kombëtare

 

Fushat objekt monitorimi të Strategjisë Kombëtare të minoritetit Rom ishin:

·        Arsimi dhe edukimi;

·        Trashëgimia kulturore dhe familja;

·        Ekonomia, punësimi, ulja e varfërisë dhe mbrojtja sociale;

·        Shëndetësia dhe infrastruktura;

·        Rendi publik, drejtësia, administrata civile.

 

Në tryezë u  paraqiten arritjet, problemet, të metat e konstatuara, arsyet e mosrealizimin të objektivave të parashikuara për përmirësimin e kushteve të jetesës së minoritetit rom si dhe u paraqiten rekomandimet përkatëse për organet e qeverisjes qëndore, vendore, organizatat rome dhe organizatat e tjera që punojnë në fushën e të drejtave të njeriut.

 

Gjatë diskutimeve theksi u vë se, megjithë ekzistencën e një baze ligjore pothuajse të mjaftueshme në këtë fushë, zbatimi i Strategjisë Kombëtare Kombëtare “Për përmirësimin e kushteve të jetesës së minoritetit Rom në Shqipëri” ka hasur vështirësi të shumta dhe ka ecur me hapa të ngadaltë; arritjet kanë qënë të pakta dhe modeste. Disa nga përfundimet kryesore që u arritën në përfundim të këtij monitorimi ishin:

 

• Objektivat dhe masat e parashikuara në Strategji nuk janë reale, të qarta dhe të matshme.

• Strategjisë i mungojnë indikatorët e suksesit për matjen dhe vlerësimin e rezultateve të arritura si edhe miratimi i një plan konkret veprimi në fushat përkatëse të saj me qëllim zbërthimin në detaje dhe me përgjegjësi të caktuara për të gjitha objektivat dhe masat e parashikuara.

• Institucionet shtetërore përgjegjëse për zbatimin e Strategjisë nuk kanë qënë eficiente në marrjen e masave konkrete dhe nuk kanë zbatuar me përpikmëri përgjegjësitë e tyre.

• Vihet re një mungesë përfshirje ekektive të institucioneve shtetërore sidomos organeve të qeverisjes vendore në zbatimin e strategjisë.

• Vihet re mungesa e një bashkëpunimi dhe koordinimi efektiv ndërmjet organeve shtetërore qëndrore dhe vendore për shkëmbimin e informacioneve lidhur me masat e realizuara dhe ato të parealizuara në drejtim të zbatimit të strategjisë; mes aktorëvë të shoqërisë civile që punojnë në fushën e minoriteteve.

• Gjithashtu, mungesa e kapaciteteve të duhura tek organizatat rome si edhe mospërfshirja e tyre në procesin e implementimit të kësaj Strategjie ndikon në mosarritjen e rezultateve të kërkuara.

• Vihet re një mungesë koordinimi dhe bashkëpunimi në zbatimin e kësaj strategjie dhe të strategjive të tjera kombëtare ose lokale të miratuara nga shtetit shqiptar.

 

Së shpejti, do të përgatiten raport i plotë dhe përfundimtar i cili do të përmbajë gjetjet dhe rekomandimet konkrete të monitorimit të Strategjisë Kombëtare “Për përmirësimin e kushteve të jetesës së minoritetit Rom në Shqipëri” i cili do të publikohet në faqen e internetit.