Trajnim i mëtejshëm i stafit të nivelit bazë të Institucionit të Paraburgimit Lezhë

10.11.2006

Komiteti Shqiptar i Helsinkit, në datat 9-10 Nëntor 2006, organizoi në ambjentet e Institucionit të Paraburgimit Lezhë sesionin e dytë të punës me stafin me uniformë të nivelit bazë të rregjimit të brendshëm të këtij institucioni. Objektivi kryesor i aktivitetit ishte për ta bërë institucionin e paraburgimit Lezhë një model të mirëmenaxhimit të sistemit të paraburgimit[1]. Objektivat specifike të këtij sesioni pune ishin kontribuimi për zbatimin më të mirë të standarteve ndërkombëtare dhe të rregullores së brendshme të burgut gjatë punës së përditshme të stafit të nivelit bazë, si edhe për t’i pajisur ata me një koncept të drejtë të sigurisë dinamike me qëllim krijimin e një atmosfere të sigurt brenda institucionit të paraburgimit dhe ruajtjen e ekuilibrit ndërmjet sigurisë, drejtësisë dhe kontrollit. Gjithashtu, menaxhimi më i mirë i situatave të vështira në një institucion paraburgimi ishte një tjetër objektiv specifik i këtij sesioni pune. Në këtë trajnim ishin të ftuar për të ofruar ekspertizën e tyre ekspertët hollandezë me një përvojë të gjatë në këtë fushë përkatësisht Z. Jan van den Brand dhe Z. Cees Boeij, të dy drejtorë të përgjithshëm në sistemin e burgjeve hollandeze. KSHH ishte i përfaqësuar në këtë aktivitet nga Znj. Edlira Papavangjeli, Kordinatore Programesh.

Më konkretisht, katër çështjet kryesore ku u përqëndrua sesioni i dytë trajnues ishin: a) siguria dhe të ndjerit i sigurt në një ambjent paraburgimi; b) si duhen parandaluar dhe menaxhuar situatat e vështira në një institucion paraburgimi të tilla si vetvrasjet, veprimet agresive dhe të dhunshme, arratisjet si edhe grevat e urisë të të paraburgosurve; c) monitorimet, inspektimet dhe kontrollet e brendshme dhe të jashtme të institucionit; d) dhe e fundit për nga rradha por jo nga rëndësia u trajtua tema e mekanizmit të kërkesë-ankesës dhe masat disiplinore[2]. Si rezultat i diskutimeve në grupe pune të temave të trajtuara dhe kazuseve konkrete nga praktika, KSHH dhe ekspertët e angazhuar në këtë sesion i prezantuan pjesëmarrësve rekomandime specifike për të cilat do të informohet njëkohësisht dhe Drejtoria e Përgjithshme e Burgjeve. Puna në këtë drejtim duhet të vazhdojë me qëllim për të përmirësuar situatën dhe për të siguruar ekuilibrin e drejtë ndërmjet sigurisë, kontrollit dhe drejtësisë dhe mbi të gjitha për të krijuar një klimë të sigurt dhe të qetë në ambjentet e paraburgimit.

Udhëzuesit e shkruar në mënyrë të shkurtër dhe të qartë duhet të jenë në dispozicion të çdo punonjësi që merret me trajtimin e incidenteve të tilla të rënda në një institucion paraburgimi si ato të përmendura më lart. Si modele për punën në të ardhmen e stafit pjesëmarrës në këtë sesion trajnues me qëllim mirëmenaxhimin e situatave të tilla sfiduese shërbyen disa çështje të ndryshme konkrete dhe të vërteta të cilat u analizuan nga të pranishmit. Pothuajse 40 pjesëtarë të stafit të nivelit bazë u trajnuan rreth këtyrë çështjeve. Në bazë të përgjigjeve të pjesëmarrësve lidhur me rezultatet e këtij trajnimi rezultoi se ata e vlerësuan këtë aktivitet si shumë të nevojshëm dhe konkret për punën e tyre. Përfaqësuesja e KSHH-së në këtë sesion pune, ekspertët dhe pjesëmarrësit vendosën lidhur me tre çështjet kryesore që do të trajtohen në sesionin e ardhshëm i cili do të organizohet gjatë vitit që vjen.