Shërbimi shëndetësor në burgje vazhdon të mbetet problem i pazgjidhur

 

13.07.2006 

Gjatë periudhës Maj-Korrik 2006, një grup ekspertësh të KSHH-së realizuan vëzhgime në disa Institucione të Ekzekutimit të Dënimeve Penale[1] me qëllim monitorimin e respektimit të të drejtave të personave që vuajnë dënimin me burgim dhe në veçanti të trajtimit të të dënuarve të sëmurë dhe ofrimin e shërbimit mjekësor në këto institucione.

 

Gjatë vëzhgimeve rezultoi se, në krahasim me periudhën Nëntor 2005-Janar 2006 kur KShH-ja ndërmori disa vëzhgime,  janë ndërmarrë hapa pozitivë[2]. Në Spitalin e Burgut ishte vënë në përdorim të plotë laboratori dhe shërbimi ambulator; në institucionin e paraburgimit nr. 302 Tiranë ishin kartelizuar të paraburgosurit dhe ishin vendosur lidhje me Institutin e Higjenës për të bërë analizat për hepatitin C dhe sëmundjet seksualisht të transmetueshme.

 

Megjithatë, gjatë vëzhgimeve të kryera vihen re disa probleme shqetësuese ende të pazgjidhura si:

 

1. Furnizimi me medikamente dhe pajisje mjekësore. Gjendja aktuale në këto institucione[3] bie ndesh me kërkesat e ligjit Nr.8328, datë 16.4.1998 “Për të drejtat dhe trajtimin e të dënuarve me burgim” neni 26 “Shërbimi shëndetësor” ku thuhet se “Shërbimi shëndetësor duhet të sigurojë furnizimin me ilaçe dhe pajisje mjekësore”.

2. Të  dënuarit  duhet t’u krijohet mundësia për konsulta me specialistë (kardiolog, endokrinolog, neurolog, etj) në Spitalin e Burgut.

3. Gjendja e të sëmurëve mendorë. Trajtimi i tyre përbën shkelje flagrante dhe mosrespektim të disa akteve ligjore, përkatësisht:

1. Nenit 82, pika 1 e dokumentit të Kombeve të Bashkuara “Tërësia e rregullave minimum për trajtimin e të burgosurve ”, i cili sanksionon se “personat me të meta mendore nuk duhet të mbyllen në burgje; se duhet të merren masa për t’i transferuar ata sa më shpejt që të jetë e mundur, në institucione për të sëmurë mendorë;

2. Ligjit nr. 8331, datë 21.4.1998, “Mbi ekzekutimin e vendimeve penale”, sipas të cilit “masat mjekësore me mjekim të detyruar ekzekutohen në institucionin mjekësor të specializuar…” (nenit 45).

3. Ligjit nr. 8328, datë 16.4.1998 “Për të drejtat dhe trajtimin e të dënuarve me burgim” ku thuhet se “Personat e sëmurë ose me shqetësime mendore dhe psikike vendosen në institucione mjekësore të posaçme ose seksione të veçanta në burgje ose në spitale jashtë sistemit të burgjeve që shërbejnë për mjekimin e tyre” (neni 16).

KShH i bën thirrje Ministrisë së Drejtësisë dhe Drejtorisë së Përgjithshme të Burgjeve që në bazë të ligjit të marrin masat e mëposhtme:

 

1. Të zgjidhë problemin e furnizimit me ilaçe dhe pajisje mjekësore për të gjitha institucionet e paraburgimit dhe burgjet në varësi të këtyre institucioneve; 

2. Të merren masa për trajtimin e specializuar të sëmurëve kronikë, me sëmundje fizike ose mendore dhe të sigurohen medikamentet e nevojshme për ta;         

3. Të merren masa për një trajtim të specializuar të grave të paraburgosura dhe të dënuara, duke ofruar shërbime të nevojshme për to si dhe të bëhen depistime (kolposkopi, eko, mamografi dhe vizitë gjinekologjike).

4. Të shpejtohen veprimet për fillimin e funksionimit të qendrës për të sëmurët në qytetin e Durrësit dhe të bëjnë transferimin pranë saj të personave që kanë nevojë për një trajtim të specializuar. 

 

Komiteti Shqiptar i Helsinkit shpreson që Ministria e Drejtësisë dhe Drejtoria e Përgjithshme e Burgjeve, të trajtojë me seriozitet problemet e mësipërme si dhe të marrë masat e nevojshme për zgjidhjen e tyre sipas kërkesave të ligjit në një kohë sa më të shpejtë të mundshme.