Fillim i projektit një vjeçar “Drejtimi i paraburgimit nga këndvështrimi i të drejtave të njeriut” në paraburgimin e Lezhës

 

16.06.2006

Më datë 7 Qershor, Komiteti Shqiptar i Helsinkit (KShH) promovoi në Institucionin e Paraburgimit në Lezhë projektin një-vjeçar që realizohohet me mbështetjen e Departamentit të Shtetit të Sh.B.A.

 

Në takimin e organizuar më këtë rast merrte pjesë Znj. Edlira Papavangjeli, Koordinatore Programesh pranë KSHH-së, Z. Charles Morrill, Political Officer, përfaqësues i Ambasadës Amerikane, Z. Jan van den Brand, Drejtor i Përgjithshëm Rajonal në Hollandë, Drejtuesit e Burgut të Lezhës si dhe administrata e paraburgimit. 

 

 

Projekti një-vjeçar prej $50,000 për rritjen e shkallës së ndërgjegjësimit dhe njohjes me të drejtat e njeriut e zbatimin e ligjeve nga administrata e paraburgimit në burgun e Lezhës ka filluar të realizohet tashmë me mbështetjen financiare të Fondit për të Drejtat e Njeriut dhe Demokracinë, pranë Departamentit të Shtetit të Sh.B.A., në bashkëpunim të ngushtë me Ministrinë e Drejtësisë, Drejtorinë e Përgjithshme të Burgjeve (DPB), Sektorin e paraburgimit Lezhë dhe KShH-në.

 

Qëllimi i takimit të realizuar përveç promovimit të programit ishte edhe thithja e mendimeve të administratës së paraburgimit dhe drejtuesëve të tij për çështjet prioritare, që duan të trajtojnë dhe metodologjinë në sesionet e ardhshme të punës në institucionin e paraburgimit të Lezhës.

 

Në përfundim të takimit, u identifikuan disa nga temat:

 

• Procesi i marrjes dhe pranimit të të paraburgosurëve si dhe trajtimi i tyre në aspektin mjekësor dhe edukativ, si dhe përgatitjen e tyre për kalimin në burg.

• Trajnimi i oficerëve dhe punonjësve të rolit të bazë që punojnë për sigurinë e brendshme të paraburgimit.

•  Një program për trajnimin e trajnerëve lokalë të këtij insitucioni.

• Mekanizmi i kërkesë ankesave.

• Struktura komunikuese dhe bashkëpunimi ndërsketorial në këtë institucion si dhe

• Bashkëpunimi dhe komunikimi i administratës së paraburgimit me botën jashtë.

 

Për zbatimin e projektit, KSHH do të përfshijë ekspertë të huaj me shumë përvojë në drejtimin e institucioneve penitenciare, juristë të kualifikuar në fushën penale, veprimtarë e vëzhgues të të drejtave të njeriut, dhe një staf të përkushtuar e me përvojë përkatëse.

 

Një nga synimet e projektit është që paraburgimi pilot i Lezhës të shërbejë si model për paraburgimet e tjera në varësi të Ministrisë së Drejtesisë në drejtim të mirëmenaxhimit të institucioneve penitenciare ku respektohen të drejtat e njeriut dhe dinjiteti i të paraburgosurve.

 

KShH vëzhgon respektimin e të drejtave dhe lirive të njeriut dhe reagon për rivënien e tyre në vend; sensibilizon shtetasit mbi mbrojtjen e të drejtave e lirive të tyre; ndihmon përmirësimin e legjislacionit e praktikës për zbatimin e ligjit nëpërmjet oponencave e rekomandimeve gjatë hartimit dhe më pas zbatimit të legjislacionit.

 

Misioni i KShH-së përfshin respektimin e të drejtave të të paraburgosurve dhe të dënuarve me burgim dhe trajtimin e tyre sipas standarteve ndërkombëtare e legjislacionit vendas. Të drejtat e të paraburgosurve dhe të dënuarve janë pjesë e rëndësishme e të drejtave themelore të njeriut. KShH ka punuar prej vitit 1998 në fushën e paraburgimit përmes projekteve vëzhguese, ndërgjegjësimit, trajnimit, këshillimit, lobimit dhe oponencave ligjore, si dhe botimeve.