Raport mbi sesionin e katërt të punës ofruar

administratës së burgut të Lezhës

Komiteti Shqiptar i Helsinkit (KSHH), në datat 5-6 Qershor 2006, organizoi sesionin e katërt të punës me administratën e burgut të Lezhës. Ky aktivitet u realizua në kuadër të projektit “Reforma në burgje dhe roli i shoqërisë civile në Shqipëri”, i cili ka për qëllim të rrisë shkallën e ndërgjegjësimit dhe të njohjes së të drejtave të njeriut dhe zbatimit të ligjeve nga ana e administratës së burgjeve. Objektivat kryesore të këtij aktiviteti ishin përmirësimi i programit ditor të aktiviteteve në burgje, struktura e komunikimit ndërmjet sektorëve të ndryshëm me qëllim realizimin e këtij programi ditor si edhe rritja e kapaciteteve profesionale të stafit të lartë dhe të mesëm drejtues të institucioneve penitenciare në procesin e menaxhimit të programit ditor në burgje. Objektivi i fundit i këtij aktiviteti për nga rradha dhe jo për nga rëndësia kishte të bënte me diskutimin lidhur me mundësitë e punësimit të të dënuarve në burgun e Lezhës si pjesë përbërëse e programit të ardhshëm ditor të aktiviteteve të këtij burgu. Në këtë sesion pune ofroi ekspertizën e tij eksperti i huaj Z. Jan van den Brand, Drejtor i Marrëdhënieve me Jashtë në Agjencinë Kombëtare Hollandeze të institucioneve të Riedukimit si edhe në të njëjtën kohë ekspert i Këshillit të Europës për Europën Qendrore dhe Lindore. Në këtë aktivitet, KSHH u përfaqësua nga Znj. Edlira Papavangjeli, Kordinatore Programesh.

 Sesioni i punës u përqëndrua në disa çështje shumë të rëndësishme të tilla si: a) indentifikimi i rëndësisë të një programi ditor aktivitetesh, b) referimi tek standartet ndërkombëtare lidhur me programin ditor të aktiviteteve në burg, c) prezantimi i programit ditor ekzistues të aktiviteteve në burgun e Lezhës si dhe ofrimi i rekomandimeve nga ana e ekspertit për përmirësimin e programit ditor ekzistues në këtë institucion. Një tjetër temë e trajtuar në këtë sesion pune kishte të bënte me ndërveprimin e sektorëve me uniformë dhe civil brenda dhe ndërmjet tyre për të vënë në zbatim programin ditor të aktiviteteve në burgje, se si duhet të realizohet misioni në burg I cili ka të bëj me trajtimin e të dënuarve me humanizëm dhe dinjitet, riintegrimin e të dënuarve në një atmosferë të hapur dhe të besueshme dhe sigurinë në burg. Gjithashtu, në këtë sesion pune vëmendja u përqëndrua dhe në prezantimin e anketimeve të kryera tek të dënuarit përsa i takon punësimit të tyre në këtë institucion riedukimi si edhe dhënia e rekomandimeve lidhur me punësimin e të dënuarve dhe trajnimet profesionale në burgje si një pjesë thelbësore e programit ditor të aktiveteve.

Rekomandimet kryesore që dolën nga ky sesion pune për Drejtorinë e Përgjithshme të Burgjeve janë si më poshtë vijon: megjithëse të ndërgjegjshëm për situatën e mbipopullimit në burgje shqiptare dhe duke ditur dhe kompleksitetin e kësaj çështje, KSHH dhe eksperti i tij rekomandon se kapaciteti total i burgut të Lezhës nuk duhet të jetë më shumë sesa kapaciteti aktual (rreth 500 të dënuar duke përfshirë në këtë shifër edhe numrin e të paraburgosurve). Kjo mund të krijojë mundësi për shfrytëzimin e një prej ndërtesave aktuale për punësimin e të dënuarve, për kurset e trajnimeve profesionale të tyre si edhe për aktivitete të tjera edukuese dhe sociale për të dënuarit.

 KSHH dhe eksperti i tij për stafin e lartë dhe të mesëm drejtues të këtij burgu rekomandojnë ngritjen e katër grupe të veçanta pune. Secili nga këto grupe duhet të përqëndrohet në trajtimin e një prej çështjeve të mëposhtme:

a)    përcaktimi i procedurave të brendshme përzgjedhëse të të dënuarve që do të punësohen në këtë burg (sektori i edukimit mund të japë inpute konkrete në këtë drejtim),

b)    vlerësimi dhe dhënia e rekomandimeve për shfrytëzimin konkret të infrastrukturës ekzistuese të këtij burgu për të mundësuar punësimin e të dënuarve në këtë institucion riedukimi (në këtë proces mund të japin inpute konkrete shefat e sektorëve),

c)    përcaktimi i tipeve/llojeve të ndryshme të punës që mund të organizohen në këtë burg dhe të ardhurat që do të përfitohen me anë të punësimit të të dënuarve (në këtë proces mund të japë inpute konkrete departamenti i financës)

d)    si edhe së fundmi nga rradha por jo nga rëndësia ka të bëjë me indentifikimin e profesionistëve të mundshëm që do të udhëheqin punën në burg.

 Këto çështje të fundit varen gjithashtu dhe nga zhvillimet e mëtejshme që do të pasojnë pas përpunimi të projektvendimit të Këshillit të Ministrave “Për punësimin e të dënuarve në burgje dhe shpërblimin e tyre” i cili vazhdon ende të jetë duke u rishikuar nga grupi i punës i ngritur nga Drejtoria e Përgjithshme e Burgjeve dhe specialistë të Ministrisë së Drejtësisë.