Raport mbi sesionin e pestë të punës
ofruar administratës së burgut të Lezhës

 

18.07.2006

Komiteti Shqiptar i Helsinkit (KSHH), në datat 10-11 Korrik 2006, organizoi sesionin e pestë të punës me administratën e burgut të Lezhës. Ky aktivitet u realizua në kuadër të projektit “Reforma në burgje dhe roli i shoqërisë civile në Shqipëri”, i cili ka për qëllim të rrisë shkallën e ndërgjegjësimit dhe të njohjes së të drejtave të njeriut dhe zbatimit të ligjeve nga ana e administratës së burgjeve. Objektivat specifike të aktivitetit ishin rritja e kapaciteteve profesionale të stafit të nivelit të mesëm të këtij institucioni në procesin e menaxhimit të burgjeve me një fokus kryesor: stafin me uniformë të burgut të Lezhës. Gjithashtu, një objektiv tjetër i aktivitetit ishte vlerësimi i të gjithë sesioneve të mëparshme të punës së realizuara nga KShH-ja me administratën e burgut të Lezhës. Në këtë sesion pune ofroi ekspertizën e tij eksperti i huaj Z. Jan van den Brand, Drejtor i Marrëdhënieve me Jashtë në Agjencinë Kombëtare Hollandeze të institucioneve të Riedukimit si edhe në të njëjtën kohë ekspert i Këshillit të Europës për Europën Qendrore dhe Lindore. KSHH në këtë aktivitet u përfaqësua nga Znj. Edlira Papavangjeli, Kordinatore Programesh.

 

Sesioni i punës u përqëndrua në disa çështje shumë të rëndësishme të tilla si roli i stafit të sigurisë së nivelit të mesëm drejtues brenda strukturës komunikuese të institucionit penitenciar. Struktura komunikuese në burg mund të jetë ajo nga lart-poshtë, nga poshtë-lart ose një kombinim i këtyre strukturave ku roli i stafit të nivelit të mesëm drejtues është shumë thelbësor në përfshirjen e inputeve të stafit të nivelit bazë dhe në bërjen prezent të këtij inputi tek drejtuesit e nivelit të lartë të burgut dhe në reflektimin e tij në procesin e hartimit të politikave dhe të mirëmenaxhimit të institucionit penitenciar. Krahas strukturës komunikuese, roli i stafit të nivelit të mesëm drejtues është shumë i rëndësishëm në plotësimin e përgjegjësive ndaj të dënuarve, të detyrave dhe përgjegjësive operacionale dhe ditore si edhe përgjegjësitë për stafin bazë gjë e cila përfshin kontributin e stafit të mesëm në procesin e rekrutimit të stafit të ri, në trajnimet dhe kurset e tjera profesionale të stafit të nivelit bazë dhe në të ardhmen e karrierës së tyre profesionale. Nga diskutimet me pjesëmarrësit në sesionin e punës doli qartë se administrata në burgun e Lezhës zbatonte një strukturë komunikuese të tipit të kombinuar dhe nga stafi i nivelit të mesëm drejtues dhe ai i nivelit bazë është bërë një punë e mirë në plotësimin e përgjegjësive ndaj të dënuarve dhe planeve operacionale të punës, por ende ka vend për rritjen e kontributit të stafit të nivelit të mesëm drejtues në procesin e rekrutimit dhe të zhvillimit të pjesës tjetër të stafit të institucionit penitenciar.

 

Gjithashtu, rezultatet e vlerësimit të pesë sesioneve të punës së zhvilluara nga KShH-ja me administratën e burgut të Lezhës ishin shumë pozitive [1].

 

Në përfundim të sesionit të punës, disa nga rekomandimet specifike për administratën e burgut të Lezhës ishin: a) qëndrueshmëria e stafit të rregjimit të burgut dhe të paraburgimit duke shmangur lëvizjet e vazhdueshme të stafit nga një regjim në një tjetër. Kjo do të rrisë përvojën e tyre në regjim dhe gjithashtu do të kontribuojë në krijimin e një strukture gjithëpërfshirëse dhe efektive brenda regjimit; b) rritja e kontributit të stafit të sigurisë së nivelit të mesëm drejtues dhe trajnimet e mëtejshme të stafit të nivelit bazë të institucionit. Në këtë kontekst, një rekomandim specifik që doli për Drejtorinë e Përgjithshme të Burgjeve ishte përfshirja e testit psikologjik dhe intervistave gojore në procesin e rekrutimit të stafit të ri të cilat duhet të organizohen në institucionet penitenciare përkatëse krahas vlerësimit të dosjeve të kandidatëve të mundshëm në plotësimin e kërkesave dhe kritereve të përcaktuara.