Ushtrimi i dhunës fizike ose psikike është i patolerueshëm dhe dënueshëm

19.06.2006

Sipas njoftimeve të shtypit, më 17 Qershor 2006, i mituri Amarildo Përfundi, nxënës i vitit të tretë, të shkollës së mesme të fshatit Pirg të rrethit të Korçës i ka dhënë fund jetës. Komiteti Shqiptar i Helsinkit dëshiron të shprehë ngushëllimet e tija familjes së të ndjerit dhe në të njëjtën kohë shpreh shqetësimin për humbjen e jetës të të riut.

 

Pavarësisht nga rrethanat dhe motivet që e kanë çuar viktimën në këtë tragjedi të dhimbshme, KShH-ja i bën thirrje Prokurorisë së Rrethit të Korçës që ta hetojë këtë çështje me përparësi dhe paanshmëri duke verifikuar deri në fund dhe në mënyrë të gjithanshme pretendimet e prindërve të tij se viktima është keqtrajtuar nga organet e policisë.

 

Me këtë rast, KShH-ja dëshiron të sjellë në vemendjen e publikut dhe të institucioneve përgjegjëse se gjatë viteve të fundit, ankesat e shtetasve për ushtrim dhune nga punonjësit e policisë nuk kanë qenë të pakta

 

KSHH, pa paragjykuar aspak rastin e viktimës A. P duke patur parasysh se kemi të bëjmë me një të mitur që vendosi t’i japë fund jetës së tij, e shikon të nevojshme të verë në dukje detyrimet ligjore që rrjedhin nga legjislacioni shqiptar dhe ai ndërkombëtar i ratifikuar nga Shqipëria lidhur me trajtimin e të miturve në kontakt me policinë dhe organet e drejtësisë, pavarësisht nga pozicioni i tyre.

 

Në çdo rast dhe për çdo arsye punonjësit e policisë, oficerët dhe agjentët e policisë gjyqësore janë të detyruar të tregojnë një kujdes të veçantë ndaj të miturve që dyshohen për kryerjen e ndonjë vepre penale, që mund të jenë dëshmirë ose viktima të një krimi, duke zbatuar me rigorozitet normat e Kodit të Procedurës Penale, legjislacionin për të mitur.

 

Nga familja e të miturit është pretenduar për ekzistencën e shenjave të dhunës në trupin e djalit të tyre. KSHH, pa paragjykuar këto pretendime dëshiron të citojë vendimin e Gjykatës Evropiane të të Drejtave të Njeriut në çështjen “RIVAS kundër FRANCËS”, ku shprehet se “kur një person mbahet nga policia, shteti merr përsipër detyrimin pozitiv që të sigurojë mirëqënien e tij. Ky parim gjen zbatim a fortiori (aq më tepër) ndaj të miturve. Çdo dëmtim i pësuar gjatë mbajtjes në polici i ngarkohet në mënyrë automatike shtetit përveçse kur Gjykata bindet se është ofruar nga ky i fundit një shpjegim i pranueshëm për të hedhur poshtë këtë prezumim”. Madje Gjykata Evropiane e të Drejtave të Njeriut e konsideron çnjerëzor dhe degradues trajtimin që shkakton dhimbje ose vuajtje fizike dhe mendore, dhe duke patur parasysh moshën, t’i krijonin të miturit ndjenjën e frikës, ankthit, inferioritetit të tilla që ta përçmonin de përulnin atë dhe mundësisht të thyenin rezistencën e tij fizike dhe morale.

 

Sipas nenit 49 të Kodit të procedurës penale kur personi ka mbushur moshën 18 vjeç, detyrimisht atij duhet t’i caktohet mbrojtës dhe pyetja duhet të bëhet në praninë e tij.  Gjithashtu, policia mbart detyrimin të njoftojë familjarët ose të afërmit e tij sapo  i mituri shoqërohet në polici si dhe informohet për arsyet e shoqërimit, të drejtat që ka dhe të asistencë psikologjike dhe ligjore.

 

Ky detyrim ligjor është parashikuar edhe në legjislacionion ndërkombëtar. Konkretisht, në nenin 10 të Tërësisë së Rregullave Minimale të Kombeve të Bashkuara në lidhje me Dhënien e Drejtësisë për të Mitur përcaktohet se “Porsa një i mitur është ndaluar, prindërit ose kujdestari i tij, njoftohen menjëherë ose në rast se kjo është e pamundur ajo duhet të bëhet brenda një afati sa më të shkurtër. E më tej në kontaktin e të miturit me organet e policisë duhet të favorizohet mirëqënia e tij dhe të mos i bëhet dëm atij...”. Kjo është e rëndësishme pasi kontakti mund të ndikojë thellë në qëndrimin e të miturit.

 

KShh-ja i bën thirrje Ministrisë së Brendshme, në mënyrë të  veçantë Policisë së Shtetit:

 

1. Të respektojnë me përpikmëri ligjin dhe të trajtojnë me dinjitet  dhe në  përputhje me ligjin dhe moshën cilindo person në kontakt me ta.

2. Të tregojnë kujdes për të gjithë përsonat në kontakt me ta, pavarësisht se mund të jenë të dyshuar, autorë, dëshmitarë.

3. Të tregojnë më shumë kujdes dhe vemendje për të miturit dhe viktimat e krimit.

4. Të mos lejojnë që në gjirin  e tyre të ketë ende punonjës policie që ushtrojnë dhunë fizike dhe psikike.