Monitorim i pikave të kalimit Kufitar të Vlorës (Port) dhe të Himarës,(Port)

 

02.02.2007

Në kuadër të projektit “Mbi respektimin e të drejtave të emigrantëve dhe të personave të kthyer”,në datat 29-30 janar 2007 u organizua një tur vëzhgimi në pikat e kalimit kufitar të Vlorës (Port) dhe të Himarës,(Port).

 

Në Pikën e Kalimit Kufitar të Portit Vlorë u kryen takime me Komandantin e P.K.K. të Portit

Përsa i përket infrastrukturës, kjo pikë nuk kishte infrastrukturë të mirë. Policia kufitare në port kishte një furgon në dispozicion, por kishte mungesa në ambjentet e nevojshme për të intervistuar personat e kthyer.

 

Në këtë pikë kufitare ishte dhuruar nga IOM një kontenier që duhej të shërbente për qëllimin e intervistimit dhe akomodimit të përkohshëm të emigrantëve dhe/ose personave të kthyer në bazë të marrëveshjes së ripranimit dhe azilkërkuesve, por aktualisht ky kontenier përdorej si zyrë, në kushtet e mungesës së ambjenteve të mjaftueshme për policinë.

 

Stafi policor nuk ishte i plotësuar dhe punohej me orare të zgjatura. Për tu përmendur është fakti që shumica e kontrollorëve dhe stafit tjetër policor ishin femra, të cilat kryenin intervistat në rastet e personave të kthyer.

Numri i personave të kthyer nga policia italiane ishte shumë i vogël, rreth 25-30 persona në muaj.Ata intervistohen nga punonjësit e policisë kufitare, kontrolloheshin dhe regjistroheshin në sistemin TIMS, dhe më pas shoqëroheshin në komisariatin e qytetit për verifikime të mëtejshme në rastet kur ishte e nevojshme. Në komisariat u merren shenjat e gishtave dhe komunikohet me komisariatet e rretheve ku personat e kthyer kishin banimin. Për personat që nuk kishin precedentë kriminalë lejoheshin të shkonin në vendbanimin e tyre, ndërsa në rastet kur personat dilnin me precedentë penalë vazhdonte procedura e mëtejshme ligjore.

 

Policia kufitare kishte bashkëpunim shumë të mirë me misionin Italian Interforza, me anë të të cilit bëhej i mundur verifikimi i të gjithë personave dhe parandalimi i trafikut ilegal.

 

Në portin e Himarës u krye një takim me titullarin e kësaj pike. Në port nuk kishte trafik personash. Linja e tragetit që kishte funksionuar me Greqinë kishte një vit që ishte mbyllur. Në këtë port kishte vetëm transport mallrash.

Në përfundim të këtij monitorimi përfaqësuesit e Komitetit dolën me disa rekomandime:

1. Të negociohet për krijimin e ambjenteve të përshtatshme të punës për punonjësit e policisë kufitare dhe të migracionit.

2. Të shikohet mundësia e përshtatjes së një dhome për trajtimin dhe intervistimin e emigrantëve dhe personave të kthyer.