Ngritja me vonesë e Komisioneve të Qendrave të Votimit - mund të cënojnë të drejtën e shtetasve për të votuar

 

05.02.2007

Sipas nenit 45 të Kodit zgjedhor, Komisionet e Qëndrave të Votimit (KQV-të) duhet të emërohen nga KZQV-të, jo më vonë se 10 ditë para datës së zgjedhjeve, d.m.th jo më vonë se data 8 shkurt 2007.

 

Mbeten ende edhe 3 ditë nga përfundimi i afatit të zbatimit të kësaj kërkese ligjore. KZQV-të janë në pritje të propozimeve përkatëse të partive politike. Nga ana tjetër, anëtarët e KQV-ve duhet të përmbushin kushtet dhe kriteret e përcaktuara në Kodin Zgjedhor. Këtë duhet ta kenë parasysh jo vetëm partitë propozuese por edhe KZQV-të që do t’i miratojnë ato.

 

Komiteti Shqiptar i Helsinkit dëshiron të bëjë me dije se janë mbi 65 mijë anëtarë dhe sekretarë të KQV-ve që duhet të emërohen. Studimi i propozimeve të partive lidhur me anëtarët e KQV-ve dhe verifikimet e tyre kërkojnë kohë. Koha kur duhet zbatuar kjo detyrë ligjore është tepër e ngushtë.

 

KShH ka parasysh faktin se krijimi me vonesë i KQV-ve do të vështirësojë së tepërmi trajnimin e tyre.

KShH ka parasysh gjithashtu se, me ndryshimet që iu bënë kodit zgjedhor, sidomos lidhur me përdorimin e çertifikatave të lindjes të lëshuara nga zyrat e gjëndjes civile para dhe mbas krijimit të rregjistrit të posaçëm (1 Nëntor 2006), trajnimi në kohë dhe me cilësi të anëtarëve të KQV-ve është i domosdoshëm.

 

Është kjo arsyeja, që KShH u bën thirrje partive politike që të jenë korrekte me zbatimin e ligjit dhe menjëherë të paraqiten në KZQV-të përkatëse propozimet e tyre. 

 

Mosrepektimi i kërkesave të ligjit lidhur me cilësitë dhe trajnimin e anëtarëve të komisioneve të qëndrave të votimit dhe vonesat në këtë proces mund të shkelen procedurat që duhen zbatuar ditën e votimit dhe si pasojë të cënohet e drejta themelore e shtetasve për të votuar dhe mund të cënohen standartet e zgjedhjeve.