Komiteti Shqiptar i Helsinkit hap klinikën ligjore falas

Komiteti Shqiptar i Helsinkit është një organizatë për mbrojtjen e të drejtave të njeriut e cila është themeluar në 19 dhjetor të vitit 1990 si “Forumi për Mbrojtjen e lirive dhe të drejtave themelore të njeriut”. Në 22 Mars 1992, organizata u anëtarësua në Federatën Ndërkombëtare të Helsinkit për të Drejtat e Njeriut, duke marrë dhe emrin që ka sot.

KShH ka si pjesë të misionit të tij mbrojtjen e të drejtave të njeriut si dhe rivendosjen e tyre në rastet e shkeljeve të ndryshme. Kjo realizohet nëpërmjet reagimeve publike, letrave drejtuar autoriteteve shtetërore, verifikimeve në vend, këshillimeve ligjore, etj,.

Sipas vëzhgimeve të organizatave të të drejtave të njeriut, mes tyre edhe KShH, shërbimi avokator falas në Shqipëri lë për të dëshiruar si në cilësi ashtu dhe në shtrirjen e shërbimeve që ofrohen. Nisur nga kjo e fundit dhe nga kërkesat e adresuara nga qytetarët, KShH ndërmori një iniciativë të re, hapjen e një Klinike Ligjore për ofrimin e shërbimit avokator falas në fushën penale, kryesisht për njerëzit në nevojë dhe që nuk kanë mundësi financiare për  të përballuar vetë shpenzimet e avokatit, falë kjo mbështetjes financiare të Komitetit Suedez të Helsinkit.

Objektivi kryesor i këtij shërbimi është forcimi i shtetit ligjor nëpërmjet mbrojtjes më të mirë të grupeve vulnerabël, të drejtat e të cilëve shkelen nga përfaqësuesit të institucioneve shtetërore.

• Kush mund ti drejtohet KShH-së?

1. Personat të cilët janë viktima të ushtrimit të dhunës, trajtimeve dhe degradimeve çnjerëzore, nga organet e policisë, personelin e vendeve të paraburgimit dhe burgjeve;

2. Personat të cilët janë viktima të diskriminimit nga punonjës të institucioneve shtetërore në përgjithësi (përfshirë dhe romët & egjyptianet).

3. Cënimi i të drejtave të shtetasve si pasojë të një procesi jo të rregullt ligjor.

• Llojet e shërbimeve të ofruara nga KShH

Shërbimi i ri i ofruar nga KShH do të përfshijë Trajtimin, verifikimin dhe këshillimin ligjor të ankesave të adresuara në KShH.

Risia që KShH do të sjellë përfshin asistencën ligjore që u ofrohet qytetarëve për plotësimin e dokumentacionit për në gjykatë, adresimin e ankesave në institucionet shtetërore kompetente, si dhe në raste të veçanta të shkeljeve flagrante të të drejtave të njeriut Përfaqësimin  e çështjeve në gjykatë.

Në këtë Klinikë ligjore do të angazhohen avokatë të kualifikuar të cilët do t’u ofrojnë qytetarëve shqiptarë jo vetëm seriozitet, cilësi por dhe konfidencialitet.

Për herë të parë në Shqipëri ofrohet një shërbim avokator i ri falas për rastet kur përfaqësues të institucioneve shtetërore kanë ushtruar dhunë, torturë dhe trajtime të tjera ç’njerëzore, kur kanë diskriminuar si dhe kur kanë shkelur të drejtat e personit për një proces të rregullt gjyqësor.  

• Shtrirja gjeografike e këtij shërbimi:

Shërbimi ligjor falas do të jetë i fokusuar në Tiranë, por nuk do të mungojnë dhe në disa rrethe ku veprojnë korrespondentët e KShH-së, konkretisht në Korçë, Shkodër, Vlorë, Elbasan, Fier, Gjirokastër.

• Mënyrat e marrjes së ankesave dhe kërkesave për përfaqësim:

1. Nëpërmjet linjes telefonike

2. Nëpërmjet takimeve në zyrë

3. Letrave drejtuar në adresën e KShH-së

Në rastet kur mendoni se të drejtat tuaja shkelen nga institucionet shtetërore objekt të shërbimit ligjor falas ju ftojmë të paraqiteni tek Komiteti Shqiptar i Helsinkit në adresat e mëposhtme:

Komiteti Shqiptar i Helsinkit

Rr. Gjin Bue Shpata, Pall 5/1

Ap.4, Tiranë

Kutia Postare 1752

Tel/Fax: 04 233671

Cel: 0355 68 20 23699

E-mail: office@ahc.org.al

e.saliu@ahc.org.al

 Për më shumë informacion mund të konsultoheni me faqen tonë të internetit

www.ahc.org.al

[1] Klinika ligjore është hapur në kuadër të projektit me titull “Për një mbrojtje më të mirë të viktimave të të drejtave të njeriut në Shqipëri”, i cili ka një kohëzgjatje 1 vjeçare (Prill 2007 – Prill 2008), mbështetur financiarisht nga Komiteti Suedez i Helsinkit