NJOFTIM PËR SHTYP

Komiteti Shqiptar i Helsinkit kontribuon për një drejtim human të burgjeve shqiptare

Me qëllim përmirësimin e respektimit e të drejtave të personave të paraburgosur dhe të dënuar, rritjen e shkallës së njohurive për të drejtat e njeriut nga administrata e institucioneve penitenciare dhe e standardeve të menaxhimit, KSHH-ja në bashkëpunim me Ministrinë e Drejtësisë dhe Drejtorinë e Përgjithshme të Burgjeve fillon zbatimin e  programit ‘Drejtimi Human i Burgjeve’.

Objektivat kryesorë të programit janë: 

• Zhvillimi i një sistemi të plotë të përzgjedhjes së personelit në administratën e burgjeve, trajnimi fillestar dhe vazhdues i tij (me fokus të veçantë në institucionet penitenciare që do të hapen së shpejti);

• Forcimi i kapaciteteve menaxhuese, funksionale dhe programeve të formimit fillestar dhe vazhdues i Qendrës së Trajnimit të Burgjeve;

• Trajnimi i stafit të nivelit të lartë drejtues në burgje si edhe i grupit të trajnuesve nga administrata e burgjeve lokale;

• Rritja e kapaciteteve menaxhuese të personelit të lartë drejtues të institucioneve që të fillojnë së funksionuar së shpejti, si ai i Fushë Krujës, Korçës dhe Vlorës;

Për realizimin e suksesshëm të kësaj nisme është i domosdoshëm përkushtimi, vullneti i mirë dhe angazhimi konkret në të gjitha veprimtaritë e planifikuara i Ministrisë së Drejtësisë, i Drejtorisë së Përgjithshme të Burgjeve, konkretisht i sektorëve përkatës, si dhe i institucioneve të tjera penitenciare, të cilët do të jenë edhe përfituesit direkt i të gjithë shërbimeve që ofron ky program.

Në zbatimin e këtij programi do të japin kontribut të çmuar ekspertë me përvojë të gjatë në fushën penitenciare të Shërbimit Holandez të Burgjeve, si edhe ekspertë kroatë, ekspertë të KSHH-së, ekspertë nga fusha akademike dhe e praktikës. Gjithashtu, Ministria e Drejtësisë dhe veçanërisht Drejtoria e Përgjithshme e Burgjeve dhe institucionet penitenciare, do të ofrojnë mbështetjen dhe kapacitetet e tyre të plota përgjatë gjithë procesit.

Ky program do të zgjasë për një periudhë 18 mujore dhe mbështetet financiarisht nga Delegacioni i Komisionit Evropian në Tiranë në kuadër të projekteve CARDS 2004. Totali i kontributeve të programit është 478.198 Euro, nga të cilat 411.250 Euro është fond i akorduar nga Komisioni Evropian.

Dy fjalë për Komitetin Shqiptar të Helsinkit

Komiteti Shqiptar i Helsinkit (KSHH), organizata e parë jo-qeveritare dhe jo-fitimprurëse ka në misionin e tij mbrojtjen, edukimin dhe ndërgjegjësimin e opinionit publik dhe të organeve shtetërore për një respektim më të mirë të të drejtave dhe lirive themelore të individit në vend. Një nga fushat me përparësi të tij ka qenë dhe mbetet respektimi i të drejtave të të paraburgosurve dhe të dënuarve me burgim dhe trajtimi i tyre sipas të gjitha standarteve ndërkombëtare dhe legjislacionit përkatës në fuqi.