Konferencë për shtyp

KShH shpreh shqetësimin se ligji “Për turizmin” cënon të drejtën e privatësisë të mbrojtur nga Kushtetuta e Shqipërisë

Në datën 14 Maj 2007, disa organizata jofitimprurëse të tilla si Zyra për Mbrojtjen e \Konsumatorëve, Qendra për Zhvillim dhe Demokratizim të Institucioneve, Grupi Shqiptar i të Drejtave të Njeriut, Qendra Shqiptare e të Drejtave të Njeriut ndërmjet tyre edhe Komiteti Shqiptar i Helsinkit organizuan një konferencë për shtyp me qëllim për të bërë publike opinionin e tyre lidhur me ligjin për “Turizmin”.  Pavarësisht nga qëllimi për përmirësimin e situatës së turizmit në vendin tonë, KShH së bashku me organizatat partnere shprehën shqetësimin se ligji “Për turizmin” cënon të drejtën e privatësisë të mbrojtur nga Kushtetuta e Shqipërisë.

Sipas nenit 17 të Kushtetutës kufizimi i të drejtave dhe lirive kushtetuese mund të bëhet vetëm me ligj, për një interes publik ose për mbrojtjen e të drejtave të të tjerëve, duke qënë në përpjesëtim me gjendjen që e ka diktuar atë dhe nuk mund të cënojë thelbin e lirive dhe të drejtave dhe në asnjë rast nuk mund të tejkalojë kufizimet e parashikuara në Konventën Europiane për të Drejtat e Njeriut. Kufizimi i të drejtave që bëhet nga ligji “Për turizimin” nuk respekton kriteret kushtetuese. Sipas nenit 20 të Kushtetutës personat që u përkasin pakicave kombëtare kanë të drejtë të shprehin lirisht, pa u ndaluar e as detyruar, përkatësinë e tyre etnike. Ligji në fjalë detyron personat që do të akomodohen në hotel ose në një njësi akomoduese që të shprehin kombësinë e tyre gjë e cila bie ndesh me nenin e mësipërm të Kushtetutës. Gjithashtu, ligji në fjalë bie ndesh me nenin 8 të Konventës Europiane të të Drejtave të Njeriut, ligjin “Për mbrojtjen e të dhënave personale” dhe ligjin “Për policinë e shtetit”.

Duke u nisur nga rëndësia e ligjit dhe cënimit që i bëhet të drejtës kushtetuese të privatësisë së individëve, organizatat partnere iu drejtuan me një shkresë zyrtare Presidentit të Republikës së Shqipërisë për t’i sugjeruar mosdekretimin e ligjit të mësipërm dhe rishikimin e tij në përputhje me parimet kushtetuese.

Më konkretisht, përkufizimi i nenit 34, në pikat 3 dhe 4, paraqet mangësi serioze dhe nuk ka të bëjë aspak me mbledhjen dhe përpunimin e të dhënave statistikore, por në fakt ndërhyn padrejtësisht në jetën private të turistëve apo klientëve të ndryshëm që akomodohen në hotelet e Republikës së Shqipërisë. Cënimi i kësaj të drejte kushtetuese bëhet akoma dhe më problematik kur të dhëna personale të turistëve dorëzohen pranë Zyrës së Shërbimit Turistik çdo muaj dhe faktit që ato janë të hapura për inspektim nga ana e çdo nëpunësi të ministrisë. Në këtë mënyrë krijohen institucione të reja që kanë të drejtë të menaxhojnë të dhënat përsonale të turistëve apo klientëve të hoteleve kur për trajtimin e të dhënave personale duhet të zbatohet vetëm ligji “Për mbrojtjen e të dhënave personale”.

Nga ana tjetër, KShH së bashku me organizatat partnere shprehën shqetësimin se ky ligj me shkeljet që i bën të drejtës së privatësisë mund të sjellë pasoja në uljen e numrin të turistëve dhe si rrjedhojë në zhvillimin ekonomik të vendit si edhe mund të cënojë jetën private të shumë qytetarëve të thjeshtë që nuk janë pjesë e personazheve të jetës publike, duke i lënë dorë të lirë personave të paautorizuar për të mbajtur të dhënat e tyre personale.