Të respektohet parimi i prezumimit të pafajësisë dhe liria e shtypit

12.04.2007 

Para disa ditësh, kryeministri i vendit, akuzoi median të lidhur me mafian. Kjo deklaratë nuk u shoqërua me ndonjë të dhënë konkrete ose të specifikuar lidhur me këto akuza. KSHH mendon se akuza ishte tepër e rëndë dhe si e tillë do të duhet të jepeshin sqarime bindëse.

Me keqardhje konstatojmë se e njëjta deklaratë u bë edhe në seancën parlamentare të datës 10 Prill 2007. Tërheq vëmendjen fakti se edhe në këtë rast nuk u përmend asnjë emër, asnjë media dhe as ndonjë fakt. Në fjalën e tij, veç të tjerave kryeministri u shpreh se “mafia po penetron në media thellësisht”.

KSHH mendon se deklarata të tilla janë sa të nxituara aq edhe shqetësuese, sepse nëse situata do të ishte e tillë, për goditjen e kësaj veprimtarie me rrezikshmëri kaq të theksuar shoqërore, do të duhej të angazhoheshin jo disa inspektorë tatimorë, por organet e specializuara të luftës kundër krimit të organizuar.

Në këto kushte, krijohet përshtypja e bazuar se në rastin konkret ndodhemi para kundërvënies së qeverisë ndaj medias që është kritike, kur dihet se qeveria në tërësi dhe funksionarët publikë duhet të jenë tolerantë edhe kur në kritikat përkatëse mund të ketë ndonjë teprim apo pasaktësi. Kjo kushtëzohet nga posti që ata zënë (të zgjedhur apo të emëruar) nga përgjegjësia që ata kanë ndaj shtetasve të tyre. Të gjithë janë të barabartë para ligjit dhe të gjithë janë të detyruar ta zbatojnë atë, por jo çdo cënim i tij është krim, jo çdo mospërmbushje e detyrimeve ligjore është veprimtari mafioze.

Nëse ka të dhëna se gazetarë, media ose pronarë të saj janë të përfshirë në veprimtari kriminale, ai që është në dijeni ose disponon të dhëna për një vepër të tillë, është i detyruar ta denoncojë atë në organet kompetente.

KSHH edhe më parë është prononcuar publikisht dhe ka bërë thirrje për respektimin e parimit kushtetues të prezumimimit të pafajësisë. Zbatimi i këtij parimi është i detyrueshëm jo vetëm për organet e drejtësisë, por edhe për administratën publike. Ky është qëndrim konseguent i Gjykatës Evropiane të të Drejtave të Njeriut dhe i Gjykatës sonë Kushtetuese.

KSHH vlerëson kontributin e çmuar të medias shqiptare në përmbushjen e misionit të saj për të informuar publikun e gjerë dhe për të qenë oponente konstruktive ndaj veprimtarisë shtetërore. Liria e shtypit dhe e fjalës së lirë nuk janë sllogane, por parime të rëndësishme të sanksionuara në Kushtetutën tonë dhe dokumentet ndërkombëtare. Zbatimi në praktikë i parimeve të mësipërme është element i rëndësishëm vlerësues për integrimin e vendit tonë në Bashkimin Evropian. Në një shoqëri demokratike, roli i medias është i pazëvendësueshëm.