Mbështetje për Drejtorinë e Përgjithshme të Burgjeve për një menaxhim më të mirë të Burimeve Njerëzore[1]

14.12.2007

Në datat 21-23 Nëntor Komiteti Shqiptar i Helsinkit (KShH) organizoi një sesion pune për hartimin e disa profileve të punës për disa pozicione pune në institucionet penitenciare, si edhe për disa modele të intervistave gojore dhe testeve të shkruara për personat që do të rekrutohen në sistemin e burgjeve. Në këtë sesion pune u punua për këto detyra konkrete me qëllim që të ndihmojë sistemin e burgjeve dhe veçanërisht sektorin e burimeve njerëzore në Drejtorinë e Përgjithshme të Burgjeve (DPB) të përmirësojë sistemin e përzgjedhjes së personelit si dhe të përshkrimeve aktuale të punës.  

Grupi shqiptar i punës u asistua përgjatë këtij procesi nga ekspertë ndërkombëtarë me eksperiencë në këtë fushë si Z. Cees Boeij Drejtor i Përgjithshëm i Burgjeve holandeze, Z. Frank Borst, Zv/Drejtor i Qendrës së Trajnimit të Burgjeve dhe Z. Jan van den Brand, Drejtori i Përgjithshëm i Burgjeve holandeze, i cili moderoi këtë veprimtari.

Grupi shqiptar i punës u prezantua me metodën STAR[2] për intervistat gojore që përdoren për kandidatët e mundshëm që përzgjidhen në sistemin holandez të burgjeve. Metoda STAR ndihmon intervistuesin të evitojë pyetjet e gabuara, si edhe të vendosë nëse kandidati i mundshëm është personi i duhur për pozicionin e punës që ka aplikuar[3], duke mbledhur informacion nga kandidati për përvojat e tij të mëparshme, detyrat që ai/ajo ka kryer, aktivitetet konkrete që ka ndërmarrë dhe rezultatet e arritura. Grupi shqiptar i punës e praktikoi këtë metodë nëpërmjet intervistave në role. Gjithashtu, pjesëmarrësit u prezantuan me të gjithë procedurën e përzgjedhjes, duke përfshirë të gjitha testet dhe intervistat e kryera për këtë qëllim.

Një temë tjetër shumë e rëndësishme që u trajtua në këtë sesion pune ishte prezantimi i modeleve të përshkrimeve të punës për pozicione të ndryshme në institucionet penitenciare holandeze. Ekspertët prezantuan formatin kryesor të përshkrimit të punës, i cili përmban qëllimin e punës në organizatën penitenciare, të dhëna personale të përgjithshme, pozicionin konkret në organizatë, një përmbledhje e rezultateve të pritshme, kufijtë e përgjegjësive etj. Grupi shqiptar i punës përpunoi tre formate të këtij lloji për pozicionet e punës së Drejtorit të një institucioni penitenciar, të Përgjegjësit të Ruajtjes së Sigurisë në një institucion penitenciar dhe të Përgjegjësit të Sektorit të Burimeve Njerëzore në DPB[4]. Pjesëmarrësit nënvizuan se këto formate kanë disa avantazhe krahasuar me përshkrimet aktuale të punës, si dhe aftëson personelin e burimeve njerëzore të evidentojë kompetencat e përshtatshme për çdo kandidat potencial për pozicionin që aplikon.

Si rrjedhim, këto formate do të bëjnë të mundur që jo vetëm të japin një pamje më të qartë të pozicionit të punës, detyrave dhe përgjegjësive të tij, por mbi të gjitha, të të gjitha rezultateve të pritshme të cilat do të shërbejnë si tregues për vlerësimin vjetor të performancës së çdo anëtari të stafit në një institucion penitenciar.

Detyra e radhës për grupin shqiptar të punës për çështjet e burimeve njerëzore është të hartojmë përshkrime të tjera të pozicioneve të ndryshme të punës në burgje dhe të përdorin pjesë të detyrave/pritshmërive në njoftimet për pozicionet e lira të punës që do të shpallen në të ardhmen.