Për progresin e kryer për Planin e Veprimit të Qendrës së Trajnimit të Burgjeve[1]

14.12.2007

Në datat 21-23 Nëntor 2007, Komiteti Shqiptar i Helsinkit (KShH) organizoi një sesion pune për progresin e kryer për Planin e Veprimit për 2008-2010 të Qendrës së Trajnimit të Burgjeve (QTB). Duke konsideruar momentin kritik në të cilin është QTB-ja dhe me qëllimin e transformimit nga sektor, siç është aktualisht, në një qendër bashkëkohore, ky sesion pune kishte si qëllim përfundimtar dhënien e kontributit dhe mbështetjen e grupit shqiptar të punës për përmirësimin dhe rregullimin në detaje të versionit të parë të planit të veprimit të QTB-së. Ky sesion pune ishte në vazhdimësi të misionit të vlerësimit që u krye në Shtator, lidhur me transformimin e QTB-së. Grupi shqiptar i punës ishte i përbërë prej specialistëve të sektorit të trajnimit, drejtorëve të institucioneve penitenciare me eksperiencë në trajnime dhe përfaqësues të nivelit të mesëm dhe të lartë në Drejtorinë e Përgjithshme të Burgjeve (DPB).

Grupi shqiptar i punës u mbështet përgjatë këtij procesi nga ekspertë ndërkombëtarë me eksperiencë në këtë fushë si Znj. Vesna Babic, Drejtoreshë e Departamentit të Trajtimit në Drejtorinë e Përgjithshme të Burgjeve Kroate, Z. Frank Borst, Zv/Drejtor i Qendrës së Trajnimit të Burgjeve Holandeze dhe Z. Jan van den Brand, Drejtor i Përgjithshëm i Burgjeve Holandeze. Znj. Edlira Papavangjeli, Menaxhere e Programit moderoi këtë sesion pune.

Grupi shqiptar i punës u prezantua në detaje me sistemin e trajnimit dhe veçanërisht, me mënyrën se si është e organizuar qendra e trajnimit, çfarë programesh u ofrohen grupeve të ndryshme synuese, module dhe burime të ndryshme trajnimi të këtyre qendrave në Kroaci, Holandë dhe Austri. Këto modele u përdorën si pika reference për grupin shqiptar të punës për ta detajuar më tej Planin e Veprimit për QTB-në shqiptare.

Ky sesion pune u fokusua tërësisht në hartimin e mëtejshëm të Planit të Veprimit duke vendosur veprimtaritë dhe shërbimet në afatet kohore për të paktën dy vitet e ardhshme. Megjithatë, përgjatë vitit 2008 QTB-ja do të zbatojë një program trajnimi prej 22 ditësh për punonjësit e sapo përzgjedhur me uniformë, i cili do të bazohet në një program të ri trajnimi me mundësinë e kombinimit të praktikës në institucionet penitenciare, nën mbikëqyrjen e instruktorëve të caktuar. Ky vit pilot do të fokusohet gjithashtu në hartimin e manualeve udhëzuese për trajnerët për zhvillimin e temave të kësaj module trajnimi, si edhe një program të plotë mësimor për trajnimin bazë për të gjithë punonjësit e sapo përzgjedhur në sistemin e burgjeve.

Kohë do t’i jepet edhe analizës së burimeve njerëzore të sektorit të trajnimit me mundësi për ristrukturimin e qendrës në terma të burimeve njerëzore dhe financiare. Më tej do të identifikohen nevojat për trajnimin e trajnerëve të QTB-së dhe llojet e kurseve që ata do të ndërmarrin do të planifikohen për t’u realizuar gjatë vitit në vazhdim. Në rast të një fluksi të punonjësve të sapo përzgjedhur, grupi shqiptar i punës pa me interes alternativën e zhvillimit të një kursi prezantues një javor i cili do të ndiqej nga një trajnim bazë 22 ditor. Përgjatë vitit 2009, si shtesë e trajnimit bazë, do të hartohen module të tjera për kurse trajnimi afatshkurtër, duke synuar stafin civil në institucionet penitenciare dhe gjithashtu, zbatimi i këtyre programeve të trajnimit do të realizohet përgjatë këtij viti.

Gjithashtu, grupi i punës hartoi strukturën me grupe specifike të temave të programit mësimor për trajnimin bazë për punonjësit e sapo përzgjedhur në institucionet penitenciare[2].

  Detyra e radhës e këtij grupi pune do të jetë përfundimi i Planit të Veprimit duke pasur parasysh punën e kryer në këtë sesion pune dhe së dyti, grupi i punës do të vazhdojë punën për shkrimin e moduleve udhëzuese për trajnerët e QTB-së përgjatë procesit të hartimit të programit mësimor të trajnimit bazë.