Komiteti shqiptar i Helsinkit  nis bashkëpunimin me këshillat bashkiakë në rrethet Fier, Elbasan dhe Gjirokastër lidhur me rritjen e aksesit të minoriteteve  në qeverisjen vendore

16.08.2007

Në kuadër të rritjes së pjesëmarrjes së minoriteteve në vendimarrje dhe rritjes së aksesit të tyre në organet e qeverisjes vendore, më datat 16-20 korrik 2007 përfaqësues i KSHH-së u takuan me përfaqësuesit e organeve të qeverisjes vendore të bashkive Fier, Elbasan dhe Gjirokastër.

KShH-ja ka nënshkruar marrëveshje bashkëpunimi me Këshillat Bashkiakë dhe së shpejti do të kryejë një vlerësim të pjesëmarrjes së minoriteteve në organet e  qeverisjes vendore dhe një vetvlerësim të administratës së bashkive përkatëse lidhur me respektimin e të drejtave të minoriteteve në nivel vendor.

KShH-ja vlerëson rëndësinë e bashkëpunimit me bashkitë respektive dhe mbështetjen e nismës  së  marrë për të vlerësuar gjendjen në veçanti të minoritetet rom dhe komunitetit egjyptian si komunitete që përballen me probleme në fushën e arsimimit, punësimit, strehimit, kushteve ekonomike, etj.

Me qëllim informimin e publikut lidhur me nismën e ndërmarrë, përfaqësues të KShH-së, korrespondentët lokalë të tij në rreth dhe kryetarët e këshillave Bashkiakë morën pjesë në një program televiziv të televizioneve lokale. Këto programe shërbyen si mjet komunikimi dhe ndërgjegjësimt të publikut për të bashkëpunuar për respektimin më të mirë të të drejtave të minoriteteve nga ana e organeve të qeverisjes vendore. Bazuar në gjetjen e vlerësimit, këshillat  bashkiakë do të hartojnë strategjitë lokale për përmirësimin e punës së tyre lidhur me pjesëmarrjen e minoriteteve në jetën publike dhe në  vendimarrje.

Veprimtaritë e mësipërme u realizuan në kuadër të projektit “Rritja e rolit të shoqërisë civile dhe institucioneve shtetërore në promovimin dhe respektimin më të mirë të të drejtave të minoriteteve”, mbështetur financiarisht nga CORDAID.