Më shumë vëmendje për respektimin e të drejtave të emigrantëve

16.08.2007

Me qëllim mbrojtjen, edukimin dhe sensibilizimin për respektimin e të drejtave të emigrantëve, KShH realizoi një mision vëzhgimi në pikën kufitare të Kakavijës të rrethit të Gjirokastrës. Qëllimi i misionit të vëzhgimit ishte monitorimi i situatës së respektimit të të drejtave të emigrantëve shqiptarë nga ana e policisë vendase dhe ajo e huaj dhe evidentimi i problemeve kryesore që hasen në këtë pikë kufitare. Metodologjia e ndjekur për vëzhgimin e situatës së të drejtave të emigrantëve konstatoi në realizimin e takimeve të drejtpërdrejta me drejtues të lartë të policisë, anëtarë të stafit të policisë kufitare dhe vëzhgimin nga afër të infrastrukturës së ambjenteve pritëse dhe mjediseve të tjera përreth. Gjithashtu, grupi i vëzhgimit mori takim dhe me emigrantë shqiptarë të ndaluar për kalim të paligjshëm të kufirit.

Disa nga përfundimet e dala nga vëzhgimi i kryer në pikën kufitare të Kakavijës janë si më poshtë:

• Për shkak të ardhjes së emigrantëve shqiptarë për kalimin e pushimeve verore pranë familjeve të tyre, fluksi i lëvizjeve në pikën kufitare të Kakavijës ishte shtuar ndjeshëm. Gjatë fundjavës, fluksi i lëvizjeve të qytetarëve dyfishohej duke shkaktuar rradhë të gjata dhe vështirësi të shumta. Aktualisht, në shfrytëzim ishin 5 sportele por numri i tyre në ditën në vazhdim pritet të rritej për t’i ardhur në ndihmë lëvizjes sa më të shpejtë të qytetarëve.

• Infrastruktura e dhomave të shoqërimit linte shumë për të dëshiruar dhe nuk plotësonte as kushtet më minimale të qëndrimit. Banjot publike mungonin. Personat e ndaluar për kalim të paligjshëm të kufirit qëndronin në kushte të rënda. Ato ndodheshin në gjendje të rraskapitur dhe të lodhur.

• Ndaj të miturve të kthyer nuk sigurohej një trajtim i veçantë në krahasim me të personat e tjerë madhorë. Për shkak të mungesës së ambjenteve të nevojshme, të miturit qëndronin në një ambjent të përbashkët me të rriturit. Ndërsa gratë qëndronin në një ambjent të veçuar nga personat meshkuj të kthyer që në shumicën e rasteve ishte një nga zyrat e personelit të pikës kufitare.   

• Vihej re mungesë e theksuar e informimit dhe sensibilizimit të qytetarëve për rregullat ligjore të kalimit të ligjshëm të kufirit. Qytetarët nuk ishin të ndërgjegjësuar për pajisjen me pasaportë dhe me vizë të rregullt të fëmijëve të tyre duke filluar që nga mosha 0 vjeç. Kjo shkaktonte pengesa dhe vështirësi të shumta sidomos për qytetarët e ardhur nga qytete të largëta të vendit. Një tjetër shqetësim i evidentuar ishte mosrespektimi nga ana e emigrantëve shqiptarë i kufizimit për të hyrë dhe për të dalë vetëm një herë me dokumentin Veveos Blu.

• Pothuajse e gjithë administrata e Drejtorisë së Policisë së rrethit të Gjirokastrës dhe e policisë kufitare ishte e re dhe sapo ishte vendosur në detyrë. Lëvizjet e herpashershme nga detyra e punonjësve të policisë, ndryshimet dhe vendosja e personelit të ri policor të patrajnuar në pozicione të rëndësishme sidomos në një periudhë të ngarkuar me fluks emigrantësh mund të sjellë vështirësi dhe probleme.

• Nga takimet e realizuara u vërejt një angazhim serioz i përfaqësuesve të policisë kufitare. Personeli policor punonte në kushte jo të mira dhe në një ngarkesë të madhe pune.

• Vihej re mangësira në njohjen e legjislacionit përkatës nga ana e administratës së policisë kufitare. Kjo për shkak të mungesave të theksuara në pajisjen me kuadrin ligjor vendas dhe atë ndërkombëtar në këtë fushë.

Në përfundim të vëzhgimit për të nxitur marrjen e masave konkrete, KShH i prezantoi organeve përgjegjëse shtetërore konkluzionet e dala nga vëzhgimi, disa rekomandime dhe sugjerime kryesore me qëllim përmirësimin e respektimit të të drejtave të emigrantëve shqiptarë dhe personave të huaj që kalojnë përmes pikës kufitare të Kakavijës.