Të dënohen veprimet çnjerëzore dhe poshtëruese të policisë greke

18.06.2007

Komiteti Shqiptar i Helsinkit me indinjatë të thellë u njoh me videon skandaloze nga ku del se punonjës të policisë greke kanë ushtruar dhunë çnjerëzore ndaj të riut shqiptar, emigrantit Paulin Papuçiut dhe një personi tjetër.

KShH e dënon fuqishëm këtë akt barbar me elementë racistë dhe kërkon t’i jepet fund veprimeve të tilla që fyejnë rëndë ndërgjegjjen e njerëzve aq më tepër kur ato ndodhin në një vend siç është Greqia, anëtare e Bashkimit Europian.

KShH vëren me keqardhje se raste të tilla poshtëruese dhe çnjerëzore që cënojnë dinjitetin e njeriut dhe që kanë dëmtuar rëndë shëndetin dhe jetën e emigrantëve shqiptarë në Greqi kanë qënë të përsërituara. Do të mjaftonte të përmendet rasti i freskët që nëpërmjet një video transmentoheshin pamje ku ushtarakë grekë në stërvitje këndonin këngë që kultivonin dhe nxisnin urrejtjen ndaj vendit fqinj, Shqipërisë dhe popullit shqiptar që aspiron integrimin në strukturat euro-atlantike.

KShH përshëndet deklaratën e Kryeministrit grek që kërkoi vënien para përgjegjësisë ligjore të anëtarëve të këtij akti çnjerëzorë si edhe median përparimtare greke që dënoi veprimet e mësipërme të policisë greke.

Por, KShH mendon se kryesorja është parandalimi i rasteve të tilla që edhe pse mund të jenë të veçuara, janë me pasoja të dëmshme. Si rrjedhim, ato nuk duhen nënvlerësuar. Me këtë rast, vlen të përmendet se një nga rekomandimet kryesore që paraqitet në Raportin e Tretë për Greqinë të Komisionit Europian kundër Racizmit dhe Intolerancës (ECRI), të datës 5 Dhjetor 2003, është marrja e masave shtesë për të garantuar hetimin e plotë të rasteve të keqtrajtimit nga ana e policisë.

Qeveria shqiptare në përputhje me dokumentet ndërkombëtare dhe legjislacionin grek duhet të kërkonte respektimin e të drejtave të emigrantëve tone, çka do të mundësonte integrimin e shpejtë të tyre në shoqërinë demokratike greke.

Në përfundim, KShH e shikon të nevojshme të përmendë se Konventa Europiane e të Drejtave të Njeriut dhe Kushtetutat e vendeve demokratike ndalojnë ushtrimin e dhunës dhe trajtimin çnjerëzor edhe ndaj personave që akuzohen për kryerjen e ndonjë vepre penale.