Trajnerët lokalë shqiptarë trajnojnë administratën e burgjeve

Në datat 10-12 Shtator 2007, Komiteti Shqiptar i Helsinkit ndërmori një mision vazhdues për të mbikëqyrur dhe vlerësuar 8 (tetë) trajnerë lokalë të burgjeve nga tre institucione lokale penitenciare, përkatësisht të I.E.D.P. Lezhë, I.E.D.P. Vaqarr dhe I.E.D.P. ‘Jordan Misja’ Tiranë, të cilët u trajnuan për trajtimin e të miturve dhe grave në institucionet penitenciare, bazuar në programin e shkruar të aktivitetit të ‘Trajnim Trajnerësh’ tw organizuar nw Qershor 2007 nga KShH-ja.

Përgjatë tre ditëve të trajnimit, u trajtua moduli i të miturve në dy prej institucioneve, përkatësisht në I.E.D.P. Lezhë dhe I.E.D.P. Vaqarr dhe moduli i grave në I.E.D.P.  ‘Jordan Misja’ Tiranë.

Trajnerët përgatitën dhe dhanë trajnime shumë të mira, më konkretisht ata trajtuan çështje si implikimet psikologjike të burgosjes së të miturve dhe grave; atmosfera në një regjim për të mitur dhe gra; menaxhimi i konfliktit, programet ditore, klima e sigurt në një institucion penitenciar, aftësitë bazë për intervistimin motivues dhe praktikat më të mira të aktiviteteve/programeve në institucionet penitenciare për të mitur dhe gra. Gjatë dhënies së trajnimit, trajnerët përdorën metodologji të ndryshme, të bazuara në versionin e parë të manualit të trajnimit.

Për të mbikëqyrur dhe mbështetur këtë mision vazhdues morën pjesë Z. Jan van den Brand, ekspert nga Shërbimi Holandez i Burgjeve, Znj. Edlira Papavangjeli Drejtuese e Projektit në KShH, Z. Mirgen Lata, Drejtor i çështjeve ligjore dhe shoqërore në Drejtorinë e Përgjithshme të Burgjeve (DPB) dhe Z. Filip Llakaj, Përgjegjësi i sektorit të trajnimeve në DPB.

Bazuar në vlerësimin e secilit prezantim, u dhanë rekomandime të ndryshme nga eksperti ndërkombëtar për çdo trajner, për të përmirësuar aftësitë e tyre didaktike, si dhe programet e trajnimit dhe përzgjedhjen e pjesëmarrësve në trajnim.

Trajnerët e konsideruan shumë të domosdoshme vazhdimësinë e këtyre trajnimeve në punën e përditshme si dhe evidentuan nevojën e mëtejshme për të përmirësuar metodën e dhënies së trajnimeve. Kjo do të zhvillojë më tej kapacitetet e brendshme të institucioneve penitenciare në dhënien e trajnimeve, si pasojë edhe përmirësimin e situatës së trajtimit të të miturve dhe grave në institucioneve penitenciare.