Raport për misionin e vlerësimit për menaxhimin e burimeve njerëzore në institucionet penitenciare shqiptare[1]

Në 24-25 Korrik, Komiteti Shqiptar i Helsinkit (KSHH) organizoi një mision vlerësimi për menaxhimin e burimeve njerëzore në institucionet penitenciare shqiptare. Qëllimi kryesor i këtij aktiviteti është përmirësimi i situatës së burimeve njerëzore, duke përfshirë procedurat e përzgjedhjes të personelit të ri, si dhe trajnimin e tyre.

Objektivi specifik i këtij aktivitetit ishte vlerësimi i situatës nga tre komponentë: menaxhimi i burimeve njerëzore, procedurat e përzgjedhjes së stafit të ri dhe sistemi i trajnimit për personelin e administratës së burgjeve; në mënyrë që të arrihen përfundime dhe rekomandime konkrete për përmirësimin e situatës aktuale. Për këtë, u realizuan një sërë intervistash me zv/ministrin e Drejtësisë, z. Eduart Halimi, me Drejtorin e Përgjithshëm të Burgjeve, z. Saimir Shehri, me përfaqësues të lartë të drejtorisë së burimeve njerëzore, sektorin e trajnimit, drejtorinë e çështjeve ligjore dhe shoqërore, drejtorinë e policisë së burgjeve në DP, si dhe me stafin e lartë drejtues të institucioneve penitenciare lokale si I.E.D.P. ‘Jordan Misja’ Tiranë, I.E.D.P. ‘Mine Peza’ Tiranë, I.E.D.P. Vaqarr, Qendrën Spitalore të Burgjeve në Tiranë.

Në këtë mision vlerësimi u angazhuan Z. Jan van den Brand dhe Z. Jacques van Huet, ekspertë holandezë nga Agjencia Holandeze e Institucioneve të Korrektimit si dhe Znj. Edlira Papavangjeli, Menaxhere e Programit.

Një raport i shkruar për këtë mision vlerësimi do të jetë  gati së shpejti për ministrinë e drejtësisë, Drejtorinë e Përgjithshme të Burgjeve si dhe për të gjitha institucionet lokale penitenciare që ishin të përfshira në këtë mision. Është e rëndësishme të nënvizohet se me gjithë kuadrin ligjor dhe procedurat e përshtatshme që rregullojnë menaxhimin e burimeve njerëzore për personelin që punon në qendër dhe në nivel lokal, ka akoma nevojë për më shumë kritere cilësore për të përmbushur me sukses përzgjedhjen e stafit të institucioneve penitenciare; ka nevojë të analizohet sesa vendimmarrje/kompetenca do t’u jepen institucioneve lokale në lidhje me menaxhimin e burimeve njerëzore; gjithashtu mund të lindë nevoja të aplikohet statusi i nëpunësit civil edhe për stafin e burgjeve lokale, ashtu siç është zbatuar për stafin në nivelin qendror; duhet të ketë mekanizma për një menaxhim më të mirë të burimeve njerëzore dhe një komunikim të strukturuar midis institucioneve lokale dhe Drejtorisë së Përgjithshme të Burgjeve; ka nevojë për një plan strategjik për Qendrën e Trajnimit të Burgjeve, një planifikim më të mirë trajnimi për stafin e sapo përzgjedhur dhe programe mësimore më të mira.

Ky mision do të pasohet nga një workshop për politikat e burimeve njerëzore që do të organizohet në Tetor 2007.