Workshop për politikat e burimeve njerëzore të sistemit të burgjeve shqiptare[1]

23.10.2007

Në datat 15-17 Tetor 2007, Komiteti Shqiptar i Helsinkit (KShH) organizoi një workshop për menaxhimin e burimeve njerëzore në institucionet penitenciare shqiptare. Qëllimi kryesor i këtij workshopi ishte hartimi i politikave dhe strategjive që do të shërbejnë për zhvillimin e burimeve njerëzore në institucionet penitenciare si Drejtoria e Përgjithshme e Burgjeve (DPB) dhe institucionet penitenciare lokale.

Objektivat specifikë të këtij aktiviteti ishin prezantimi i parimeve dhe modeleve të politikave të zhvillimit të stafit, të sistemit të karrierës, si dhe të prezantonin përfitimet e politikave/strategjive dhe procedurave të tilla, me qëllim ndërtimin e një institucioni të qëndrueshëm në vazhdimësi lidhur me burimet njerëzore si edhe mirëfunksionimit të përgjithshëm të institucionit.

Në këtë aktivitet morën pjesë stafi i nivelit të lartë drejtues në DPB, veçanërisht drejtoria e burimeve njerëzore, sektori i trajnimit, drejtoria e çështjeve ligjore dhe shoqërore, drejtoria e policisë si dhe stafi i nivelit të lartë në institucionet penitenciare lokale.

Të përfshirë në këtë aktivitet/workshop ishin dy ekspertë ndërkombëtarë Z. Jan van den Brand and Z. Jacques van Huet, nga Agjencia Holandeze e Institucioneve të Korrektimit. Znj. Edlira Papavangjeli, Menaxhere e Programit,  moderoi këtë aktivitet.

Ekspertët i pajisën pjesëmarrësit me një koncept të qartë të Burimeve Njerëzore dhe çka është më e rëndësishme me parimet universale më të rëndësishme të cilat udhëheqin këtë qasje drejt çështjeve të tilla si planifikimi dhe zhvillimi i stafit, karriera në institucionet penitenciare, struktura e institucionit etj.. Në këtë workshop u punua mbi një model konkret holandez[2] për procedurat e përzgjedhjes së stafit, i cili siguron cilësi krahas kritereve objektive të përzgjedhjes së stafit, bazuar në legjislacionin penitenciar shqiptar. Veç kësaj, ekspertët i shpjeguan pjesëmarrësve një model liste me kompetencat e që përdoren në procesin e përzgjedhjes së stafit që punon në institucionet penitenciare shqiptare. Një punë e konsiderueshme u krye nga pjesëmarrësit, në lidhje me kompetencat e nevojshme për të tre nivelet e menaxhimit në burgje, përkatësisht niveli i lartë, i mesëm dhe niveli bazë. Përfundimet e nxjerra nga grupi i punës, do të përbëjnë bazën e workshopit për krijimin e profileve/funksioneve të vendeve të ndryshme të punës në burgje, i cili do të organizohet në Nëntor nga KShH-ja. Pjesëmarrësit e vlerësuan këtë workshop si shumë të dobishëm për ndryshimet e nevojshme që duhen bërë, në mënyrën se si menaxhohen burimet njerëzore në sistemin penitenciar shqiptar.

Pjesëmarrësit veçuan çështjet prioritare në lidhje me menaxhimin e burimeve njerëzore, të cilat mund t’i gjeni poshtëshënuar.

Sistemi penitenciar shqiptar duhet të zhvillojë:

1. procedura të përshtatshme të përzgjedhjes së punonjësve të burgjeve, në mënyrë që të sigurohet  cilësi e mirë e personelit të burgjeve;

2. trajnim bazë të përshtatshëm për punonjësit e sapo-përzgjedhur, nga qendra e trajnimit të burgjeve;

3. trajnim të mirë për grupet drejtuese në burgje, në mënyrë që ata të jenë të aftë të marrin më shumë përgjegjësi;

4. procedura për mbrojtjen e stafit, duke iu siguruar mundësi për zhvillimin e karrierës;

5. kushte të pranueshme dhe të mira pune për stafin e burgjeve.