Komiteti Shqiptar i Helsinkit nxit respektimin e të drejtave të emigrantëve në përputhje me standartet europiane

Komiteti Shqiptar i Helsinkit (KShH-ja) është një organizatë me një përvojë të gjatë në monitorimin e respektimit të të drejtave të njeriut, konstatimin e shkeljeve dhe  bërjen prezent të tyre pranë institucioneve përgjegjëse shtetërore duke ofruar rekomandime përkatëse për respektimin më të mirë të të drejtave të njeriut dhe standarteve për një shtet ligjor. Në misionin e KShH-së përfshihet edhe respektimi i të drejtave të emigrantëve shqiptarë kudo që ata ndodhen.

Në këtë kuadër, duke filluar nga muaji maj 2007, KSHH-ja ka filluar zbatimin e projektit një vjeçar, „Standartet europiane dhe respektimi i të drejtave të emigrantëve”.

Përmes këtij projekti synohet të përmbushen dy objektiva kryesore:

a.  Mbrojtja e të drejtave të emigrantëve shqiptarë, shtetasve të kthyer nga vende të  treta dhe personave pa shtetësi në kuadër të Marrëveshjes së Ripranimit.

b.  Monitorimi i hapave dhe progresit të bërë në kuadër të përmbushjes së objektivave për integrimin europian të Shqipërisë në fushën e politikave të emigracionit dhe menaxhimit të kufinjve.

Raporti i monitorimit të progresit të masave të ndërmarra nga institucionet përgjegjëse shtetërore do të sigurojë një proces të hapur dhe transparent për publikun e gjerë duke identifikuar mangësitë dhe problemet, sfidat dhe rekomandimet për zgjidhjen e tyre. Gjithashtu, raporti i monitorimit do të rrisë ndërgjegjësimin e grupeve të ndryshme të interesit lidhur me çështjet e migracionit të ligjshëm dhe kalimit të kufirit.

Në kuadër të projektit, do të kryhen monitorime të respektimit të të drejtave të emigrantëve shqiptarë, shtetasve të kthyer nga vende të treta dhe personave pa shtetësi nga veprimet e institucioneve shtetërore shqiptare dhe institucioneve përkatëse të shteteve fqinj në kufi me Shqipërinë; do të kontribuohet për rritjen e aksesit të viktimave të shkeljeve të të drejtave të njeriut për mekanizmat mbrojtës të të drejtave të njeriut; do të monitorohet zbatimi i Marrëveshjes së Stabilizim-Asocimit në fushën e menaxhimit të kufinjve dhe politikave të migracionit si edhe do të ofrohen rekomandime konkrete për përmirësimin e projektligjeve të hartuara për nxitjen e migracionit të ligjshëm në përputhje me standartet e të drejtave të njeriut dhe ato ndërkombëtare.

Forcimi i bashkëpunimit me organizata të tjera të të drejtave të njeriut  në vend dhe në shtetet fqinje përmes krijimit dhe forcimit të rrjeteve të bashkëpunimit është gjithashtu një objektiv i projektit. Pjesë e rëndësishme e kësaj inisiative do të jetë vazhdimi i bashkëpunimit të KShH me Monitoruesin Grek të Helsinkit për monitorimin dhe verifikimin e respektimit të shkeljeve të të drejtave të emigrantëve shqiptarë, veçanërisht në kufirin Shqipëri – Greqi dhe ndjekja e rasteve në Gjykatën e Strasburgut.

Kjo inisiativë mundësohet me mbështetjen financiare të Komitetit Norvegjez të Helsinkit dhe do të zbatohet në bashkëpunim të ngushtë me aktorët kryesorë në këtë fushë dhe me organizatat simotra në vendet e tjera.