Largim flagrant nga puna i Z. Xhemal Qefalia

27.02.2007

Komiteti Shqiptar i Helsinkit edhe më parë ka reaguar për largime të pabazuara nga administrate publike, midis tyre edhe në sektorin e paraburgimit dhe burgjeve. Disa nga këto çështje janë bërë objekt shqyrtimi në Komisionin e Shërbimit Civil dhe në gjykatë. Shumë nga kërkesat ankimore janë zgjidhur në favorin e ankuesve.

KSHH e shikon të nevojshme të reagojë publikisht për një rast tjetër të këtyre ditëve të fundit që mendojmë se është tepër flagrant, atë të largimit nga puna të ish-drejtorit të burgut 313 Tiranë, Z. Xhemal Qefalia.

Lidhur me këtë çështje, ai ka informuar edhe Komitetin Shqiptar të Helsinkit, Shkurtimisht, ankesa e tij paraqitet si më poshtë:

Para një muaji, nga disa persona, atij i është kërkuar të bindte vëllanë e tij, Z. Kujtim Qefalia që të hiqej nga kandidatura për komunën e Dajtit në Tiranë, mbështetur nga opozita. Meqë kjo kërkesë nuk u pranua, iu kërkua dorëheqja nga detyra e Drejtorit të Burgut 313. Por dhe këtë kërkesë, ai e refuzoi. Pas kësaj iu ofrua detyra e specialistit të burgjeve në Ministrinë e Drejtësisë. Për të mos mbetur pa punë, duke patur një karrierë të gjatë dhe të suksesshme në sektorin e burgjeve, ai pranoi të fillonte detyrën e specialistit pranë kësaj Ministrie.

Me shkresën Nr. 798/1, datë 9.02.2007, dorëzoi detyrën e Drejtorit dhe filloi si specialist në Ministrinë e Drejtësisë. Shkresa e mësipërme mban firmën e Ministrit të Drejtësisë. Në mënyrë të papritur dhe të befasishme, pas 6 ditëve dhe pikërisht me shkresën nr. 798/II, datë 15.02.2007, përsëri të firmosur nga Ministri i Drejtësisë, u vendos largimi i tij edhe nga kjo detyrë pa asnjë motivacion.

KSHH si një organizatë që ka monitoruar vazhdimisht respektimin e lirive dhe të drejtave të shtetasve në vendet e vuajtjes së dënimit dhe të paraburgimit, ka vlerësuar në mënyrë të veçantë punën cilësore menaxhuese dhe profesionale të Z. Xhemal Qefalia, si dhe përpjekjet e tij për zbatimin rigoroz të ligjit. Vlerësime të tilla pozitive ka edhe nga disa organizata vendase dhe të huaja të angazhuara në fushën e zbatimit të reformave bashkëkohore në burgjet dhe vendet e paraburgimit si dhe në drejtësinë penale të të miturve.

Z. Xhemal Qefalia ka përvojë të gjatë prej 12 vjetëve në sektorin e burgjeve. Ai është trajnuar në disa vende të Evropës Perëndimore si p.sh. në Angli, Gjermani, Hollandë, etj.

KSHH e shikon me vend të përmendë vlerësimin pozitiv që vetë Drejtori i Përgjithshëm i Burgjeve, Z. Saimir Shehri i ka lëshuar atij më datë 15.02.2007, pikërisht ditën kur ka marrë dijeni për largimin e tij nga puna. Në këtë vërtetim thuhet: “...gjatë periudhës që ka punuar në këtë pozicion ka patur marrëdhënie korrekte si me eprorët, ashtu edhe me punonjësit e institucionit të shoqëruar këto me një tregues të mirë aftësie profesionale. Me përvojën që ka në sistemin e burgjeve, ai ka pasqyruar nivel  gjykimi objektiv për çështjet e ndryshme duke ndihmuar në përmirësimin e gjendjes në institucionit që ai ka drejtuar”.

Për KSHH-në do të mjaftonte vetëm përmbajtja e këtij vlerësimi pozitiv që përmendëm më lart, për të arritur në përfundimin se largimin i tij nga puna është bërë për motive politike, si rrjedhim ai është i kundraligjshëm.

Duke marrë shkas nga rasti i mësipërm, KSHH e shikon të nevojshëm të evidentojë faktin se pushimi, lirimi, lëvizja dhe transferimi në detyrë për qëllime zgjedhore, me përjashtim të rasteve të motivuara është ligjërisht i ndëshkueshëm (shih nenet 5 dhe 179 të Kodit Zgjedhor).

Do t’i sugjeronim Ministrit të Drejtësisë që të rishikonte edhe një herë masën e marrë kundër Z. Xhemal Qefalia dhe të vendosë rikthimin e tij në punën e mëparshme gjë që do t’i shërbente përmirësimit të mëtejshëm të aftësive profesionale dhe menaxhuese të administratës së burgjeve.