Komiteti shqiptar i Helsinkit rekomandon marrjen e masave për mbarëvajtjen e procesit zgjedhor  për zgjedhjet vendore 2007

Të merren masa për furnizim të padërprerë me energji elektrike

Komiteti Shqiptar i Helsinkit i ka dërguar letër Z. Çlirim Gjata, Kryetar i Komsionit Qëndror të Zgjedhjeve, më 16 Janar 2006 lidhur me marrjen e masave nga KQZ për pajisjen me 2 qirinj të komisioneve të zgjedhjeve. KSHH-ja ka shprehur shqetësimin e tij se dy apo tre ditë para ditës së zgjedhjeve, ditën e votimit dhe gjatë gjithë kohës së numërimit të votave dhe nxjerrjes së rezultatit të zgjedhjeve në bazë KZQV-je, drita elektrike nuk duhet të mungojë.  

Sa më sipër, KSHH ka sugjeruar marrjen e masave nga organet kompetente për garantimin e vazhdimësisë normale të procesit zjedhor. Në këtë kuadër, pajisja me dy qirinj mund të ishte masa më pak e përshtatshme dhe më pak e efektshme. Veç kësaj, transmetimi televiziv i kësaj mase të marrë nga KQZ-ja mund të ndikonte negativisht edhe në psikologjinë e zgjedhësve. Prandaj KSHH sugjeroi që në pamundësi të përdorimit të gjeneratorëve, të siguroheshin llampa neoni, ose mjete të tjera me ndriçim më të madh dhe më të qëndrueshëm. Përdorimi i qirinjve, qoftë edhe si pasojë e ndonjë pakujdesie, mund të shoqërohej me pasoja të dëmshme.

Këtë shqetësim KSHH-ja e  ka ngritur përsëri në  një letër tjetër të datës 19 janar 2007. Me qëllim  mbarëvajtjen e  procesit zgjedhor  në prag të ditës së votimit, gjatë ditës së votimit dhe të numërimin e votave, KSHH i ka dërguar letër z. Genc Ruli, Ministër i Ekonomisë, z. Andi Beli, Drejtor i KESH dhe për dijeni Prof.dr. Sali Berisha, Kryetar i Këshillit të Ministrave të Republikës së Shqipërisë lidhur me marrjen e masave për furnizim të pandërprerë me energji elektrike. Në këtë letër, KSHH-ja thekson se “nisur nga vështirësitë për furnizim të pandërprerë me energji elektrike, KSHH sugjeron marrjen e masave 2-3 ditë para ditës së zgjedhjeve, ditën e zgjedhjeve dhe 2-3 ditë pas datës së zgjedhjeve, veçanërisht në ato zona apo njësi ku zhvillohen proceset zgjedhore dhe ku do të bëhet numërimi i votave, në mënyrë që të sigurohet ndriçim i pandërprerë.

Gjithashtu KSHH ka sugjeruar që të gjitha masat që do të merreshin në këtë drejtim, të bëheshin publike. Kjo gjë ka të bëjë jo vetëm me transparencën e qeverisë, por do të ndikonte pozitivisht në psikologjinë e zgjedhësve.

E drejta e ankimit të zgjedhësve në lidhje me listat e zgjedhësve duhet të garantohet në praktikë

Në datën 16 Janar 2007, Komiteti Shqiptar i Helsinkit i ka dërguar në letër z. Çlirim Gjata, Kryetari i Komsionit Qëndror të zgjedhjeve dhe Prof.dr.Sali Berisha, kryeministër  i Shqipërisë lidhur me realizimin në praktikë të ankimimin e zgjedhësve nëse emrat e tyre nuk janë në listën ose mbartin  gabime .

Në këtë letër, KSHH-ja ngre shqetësimin se në ndryshimet që iu bënë Kodit Zgjedhor me ligjin nr. 9676, datë 13.01.2007 nuk thuhet gjë lidhur me rolin e gjykatave në rastin kur një shtetas nuk gjendet në listat e zgjedhësve. Për këtë, KSHH ka sugjeruar që duke qenë se sipas nenit 40 pika 7 “Dispozita kalimtare”, të ligjit nr. 9676, datë 13.01.2007, shtetasi brenda 48 orëve nga marrja dijeni për vendimin e kryetarit të bashkisë, komunës ose njësisë bashkiake ose nga kalimi i afatit për marrjen e vendimit mund t’i drejtohet gjykatës të rrethit gjyqësor. Gjithashtu KSHH ka sugjeruar që në bashkëpunim me Gjykatën e Lartë të jepet orientimi për gjykatat e rretheve gjyqësore në lidhje me dokumentat që duhet të paraqesë një shtetas, emri i të cilit nuk gjendet në listat e zgjedhësve, për të vërtetuar të drejtën për të votuar.

KSHH ka tërhequr vëmendjen se në nenin 60 të Kodit Zgjedhor në fuqi parashikohet edhe ankimi i zgjedhësit në gjykatën e rrethit përkatës gjyqësor kur konstaton se emri i tij nuk ndodhet në listat përfundimtare, ndërsa në nenin 40 të ligjit nr. 9676, datë 13.05.2007, nuk bëhet fjalë për ankimin e zgjedhësit pas shpalljes së listave përfundimtare.

Studentëve duhet ti garantohet e drejta për të votuar

Më datën 19 janar 2007, Komiteti Shqiptar i Helsinkit i ka dërguar letër Z. Shezai Rrokaj, Rektor i Universitetit të Tiranës, Z. Genc Pollo, Ministër i Arsimit dhe Shkencës si edhe të gjithë rektorëve të Universiteteve Shtetërore dhe Private të tjerta lidhur  me krijimin e mundësive që studentët të votojnë në vendet e tyre të banimit. Në këtë kuadër KSHH vëren se me ndryshimet që i janë bërë Kodit Zgjedhor me ligjin nr. 9676, datë 13.01.2007, janë shfuqizuar të gjitha dispozitat ku bëhet fjalë për Regjistrin e Përkohshëm dhe si rrjedhim edhe hartimin e listave me zgjedhës me vendëqëndrim të përkohshëm.

Sa më sipër, KSHH ka sugjeruar që të krijohet mundësia që në periudhën 16-19 shkurt 2007, të mos caktohen provime ose detyrime të tjera mësimore, në mënyrë që studentët të votojnë në vendet e tyre të banimit, atje ku kanë Regjistrin themeltar të banimit në zyrat përkatëse të gjendjes civile.