Shkeljet e kodit të Etikës  në fushatat zgjedhore– shqetësim edhe i përfaqësuesve të medias

27.01.2007 

Fillimi i fushatës zgjedhore nga  grupimet politike dhe shkelja e Kodit të etikës ishte tema e  debatit në një emission televiziv të televizionit Vizion+, të zhvilluar më 22 janar 2007. Në këtë emision  ishte e ftuar Znj. Vasilika Hysi, drejtore ekzekutive e KShH-së për të shprehur qëndrimin dhe rolin e organizatës  në vëzhgimin e   zgjedhjeve.

KShH-ja reagoi me një deklaratë publike ndaj gjuhës së përdorur nga ana e Partisë Demokratike gjatë hapjes së fushatës elektorale, gjë e cila binte ndesh me Kodin e Etikës së partive politike gjatë fushatës elektorale.

Në intervistën e saj dhënë në media, pas takimit me Presidentin e Republikës, Vasilika Hysi u shpreh se KShH-ja është i shqetësuar për fillimin jo të mbarë të fushatës elektorale megjithëse ka patur marrëveshje ndërmjet forcave politike se partitë politikë, kandidatët  dhe anëtarët e tyre nuk do të botojnë ose do të bëjnë akuza shpifëse ose irrituese rreth partive, kandidatëve  ose personave të tjerë”. Misioni i shoqërisë civile në përgjithësi, dhe Komitetit Shqiptar në veçanti synon të ndërgjegjësojë klasën politike për një respektim më të mirë të të drejtave të votuesve. Megjithatë monitorimi i fushatës elektorale do të krijojë mundësi për të ngritur zërin ndaj shkeljeve të Kodit të Etikës  me qëllim që kandidatët dhe forcat politike të tyre të  paraqesin në mënyrë transparente të votuesit alternativat e qeverisjes në mënyrë të kulturuar .

Gjithashtu ajo bëri me dije se gjuha e urrejtjes nuk përdoret për herë të parë nga forcat politike. Pikërisht për këtë arsye, brenda një periudhe një javore KSHH ka reaguar tre herë ndaj këtij fenomeni, por në Shqipëri zëri i shoqërisë nuk dëgjohet dhe vlersohet sa duhet nga partitë politike. Gjuha e urrejtjes është një ndër standardet e zgjedhjeve. Në këtë kuadër është i rëndësishëm kontribuimi i shoqërisë civile dhe rritja e presionit për respektimin e Kodit të Etikës nga ana e forcave politike.