Komiteti Shqiptar i Helsinkit përfundoi sesionet trajnuese me administratën e institucionit të paraburgimit Lezhë

28.06.2007 

Në datat 31 Maj - 1 Qershor 2007, në ambjentet e institucionit të paraburgimit Lezhë, Komiteti Shqiptar i Helsinkit (KShH) organizoi sesionin e pestë dhe të fundit trajnues[1] me administratën e këtij institucioni. Temat kryesore ku u përqëndrua sesioni ishin: hartimi i protokolleve specifike për disa situata të rënda në institucion, hartimi i programeve të veçanta ditore për kategori të ndryshme të paraburgosurish me një fokus të veçantë të miturit si edhe dhënia e rekomandimeve lidhur me projektet e punësimit të hartuara nga grupi i punës i burgut të Lezhës. Gjatë këtij aktiviteti u zhvillua vlerësimi me shkrim i përgjithshëm i sesioneve trajnuese të realizuara nga KShH me të gjithë pjesëmarrësit në këto aktivitete. Grupi synues i sesionit ishte: stafi i nivelit të lartë dhe të mesëm menaxhues i regjimit të paraburgimit duke përfshirë dhe shefat e personelit civil dhe me uniformë dhe të gjithë përfaqësuesit e sektorit të edukimit të këtij paraburgimi[2]. Ekspertët z. Jan van den Brand dhe z. Cees Boeij, të dy Drejtorë të Përgjithshëm në shërbimin e burgjeve holandeze ofruan ekspertizën dhe përvojën e tyre në këtë sesion. KShH u përfaqësua nga znj. Edlira Papavangjeli, Koordinatore Programesh e cila moderoi këtë veprimtari.

Ekspertët i ofruan pjesëmarrësve modele të protokolleve të shkruara për disa situata të rënda në institucionet e paraburgimit dhe në burgje të tilla si protokolle të integritetit, të vetvrasjeve, sëmundjeve ngjitëse etj. Ata shpjeguan avantazhet e pajisjes me protokolle të qarta dhe transparente për të gjithë stafin në institucionet penitenciare dhe çfarë mund të ndryshohet për institucionin e Lezhës. Një kohë e konsiderueshme në këtë trajnim iu kushtua pasurimit të programit ditor dhe programit javor ekzistues të rregjimit të paraburgimit të Lezhës dhe bërja e tyre sa më fleksibël për nevojat e grupeve të veçanta të paraburgosurish si në rastin e të miturve. Ekspertët gjithashtu ofruan rekomandime mbi programe të tipeve të ndryshme si pjesë integrale e progameve ditore dhe javore. Pjesëmarrësit të ndarë në grupe pune hartuan një tip protokolli i cili do të përdoret në institucionin e Lezhës në rast të situatave të ndryshme lidhur me vetvrasjet. Krahas kësaj, grupet e punës punuan në hartimin e tre propozimeve të ndryshme për përmirësimin e programit ditor të institucionit të paraburgimit Lezhë të cilat u diskutuan dhe u komentuan edhe nga ekspertët pjesëmarrës.

Në përputhje me kërkesën e nivelit të lartë menaxhues të institucionit të paraburgimit Lezhë, dita e dytë u përqëndrua në analizimin tërësor përmes metodës SMART dhe SWOT nga ana e ekspertëve të dy projekt-propozimeve të punësimit të hartuara nga një grup pune i këtij institucioni. Pjesëmarrësit u pajisën me njohuri dhe aftësi në vlerësimin në të ardhmen të propozimeve të tilla me qëllim për t’i bërë ato sa më shumë specifike, të matshme, të pranueshme, realiste dhe të kufizuara në kohë.

Në përputhje me vlerësimet me shkrim të të gjithë sesioneve trajnuese të realizuara në një periudhë një vjeçare me stafin bazë me uniformë të institucionit të paraburgimit Lezhë, rreth 80% e pjesëmarrësve i vlerësuan këto seminare si shumë të dobishme për punën e tyre të përditshme. Ata i konsideruan këto seminare trajnuese si një mundësi e mirë ku praktika ishte ndërthurur shumë mirë me teorinë. Të gjithë pjesëmarrësit shprehën se kanë përfituar shumë nga këto seminare në punën e tyre të përditshme dhe se këto trajnime duhet të jenë pjesë e rritjes së kapaciteteve të tyre profesionale në të ardhmen.