Qëllimi i projektit është të rrisë transparencën publike lidhur me procesin e integrimit europian të Shqipërisë, të rrisë ndërgjegjësimin dhe përgjegjshmërinë e institucioneve shtetërore për rolin e tyre në këtë proces nëpërmjet monitorimit të pavarur, objektiv dhe profesional të masave të marra dhe progresit të arritur nga Shqipëria në drejtim të realizimit të Programit të Parneritetit Europian. Në kuadër projektit, Fondacioni Soros në bashkëpunim me KShH, institutin e Studimeve Ndërkombëtare dhe Qendrën Europiane[1], përmes indentifikimit të mangësive ligjore dhe problemeve kryesore synojnë të ofrojnë oponencë konstruktive në fushat ku do të shtrihet monitorimi me qëllim që të kontribuojë në përshpejtimin e afrimit të Shqipërisë në familjen europiane.

Objektivat kryesore të projektit: 

1. Të monitorojë zbatimin e reformës ligjore dhe institucionale të realizuar nga institucionet shtetërore në kuadër të zbatimit të Marrëveshjes së Stabilizim-Asocimit (MSA) të nënshkruar nga Shqipëria me Bashkimin Europian.

2. Të kontribuojë në nxitjen e qeverisë dhe të aktorëve të tjerë shtetërore për një zbatim sa më të shpejtë dhe në përputhje me kërkesat e shtetit të së drejtës të reformave ligjore dhe institucionale.

3. Të kontribuojë në rritjen e përgjegjshmërisë dhe transparencës së institucioneve shtetërore përgjegjëse për përmbushjen e detyrimeve dhe marrjen e masave përkatëse që burojnë nga MSA; 

4. Të kontribuojë në rritjen e rolit të shoqërisë civile në procesin e integrimit europian, në monitorimin dhe ofrimin e oponencës konstruktive në mbështetje të institucioneve shtetërore.  

Fushat e monitorimit  

Në kuadër të projektit, KShH do të kontribuojë në monitorimin e realizimit të objektivave në fushat:

1. e zgjedhjeve dhe çështjeve të tjera parlamentare,  

2. e mbrojtjes dhe respektimit të të drejtave të minoriteteve,

3. sistemit gjyqësor,

4. sistemit të paraburgimit dhe të burgjeve,

5. sistemit përmbarimor.

Përmes monitorimit dhe ofrimit të ekspertizës, KShH do të ndjekë hap pas hapi masat e ndërmarra nga qeveria, do të bëjë publike periodikisht të dhënat dhe rezultatet e vëzhgimit në dy raporte monitorimi: një raport do të publikohet në muajin Maj dhe raporti përfundimtar në muajin Tetor të këtij viti, si edhe do të ofrojë rekomandime për ecurinë e zbatimit të MSA-së.

Rezultatet e projektit

Disa nga rezultatet e pritshme të projektit janë:

• Vlerësim i jashtëm, objektiv, i panashëm dhe profesional i zbatimit të detyrimeve që rrjedhin nga MSA;

• Ofrimi i rekomandimeve dhe sugjerimeve konkrete institucioneve shtetërore për realizimin e detyrimeve që rrjedhin nga MSA;

• Mendim alternativ i shoqërisë civile lidhur me përmbushjen e angazhimeve të qeverisë shqiptare në kuadër të procesit të integrimit; 

• Publiku dhe aktorë të tjerë të shoqërisë civile do të jenë më të informuar lidhur me arritjet dhe mangësitë në procesin e integrimit;

• Shoqëria civile do të jetë më e ndërgjegjësuar lidhur me procesin e integrimit europian dhe detyrimet e Shqipërisë dhe rolin e saj në këtë proces;  

• Transparanca e procesit të integrimit do të rritet duke e bërë atë më të kontrollueshëm dhe të prekshëm nga opinioni publik.

Buxheti i projektit është 20000 Dollarë.