Komiteti shqiptar i Helsinkit trajnon vëzhguesit e tij për zgjedhjet vendore të 18 shkurtit 2007

09.02.2007

Për vëzhgimin e zgjedhjet vendore të 18 shkurt 2007, Komiteti shqiptar i Helsinkit akreditoi 150 vëzhgues afatgjatë të cilët do të vëzhgojnë aspekte të procesit parazgjedhor, fushatën zgjedhore, procesin e votimit dhe atë të numërimit të votave në Tiranë, Durrës, Fier, Gjirokastër, Korçë, Shkodër, Vlorë dhe Elbasan dhe në disa komuna të vendit.

Pas  akredimit të  vëzhguesve nga KQZ-ja., më 27 janar 2007, KShH zhvilloi trajnimin e tyre lidhur me çështje të tilla si: kodi zgjedhor dhe ndryshimet e tij,  udhëzimet e KQZ-së, metodologjia e vëzhgimit të procesit parazgjedhor dhe zgjedhor, respektimit të kodit të sjelljes, mënyra e raportimit. Pjesë e trajnimit ishin roli i vëzhguesit, cilësitë e tij, mënyra e paraqitjes së vërejtjeve në komision, në rast nevojë dhe raportimi i rezultateve të vëzhgimit.

Në procesin parazgjedhor, KShH do të monitorojë aspekte që kanë të  bëjnë me ushtrimin e votës si: shpallja e listave paraprake dhe atyre përfundimtare, verifikimi i listave dhe  korrigjimi i tyre, informimi i shtetasve për listat dhe mënyrën e korrigjimit të tyre, caktimi i qëndrave të votimit, ngritja e KQV-ve dhe grupeve të numërimit dhe trajnimi i anëtarëve të tyre, respektimi i heshtjes zgjedhore dhe Kodit të Sjelljes. Në mënyrë të veçantë, vëzhguesit e Komitetit Shqiptar i Helsinkit do të përqëndrojnë vëmendjen e tyre në monitorimin e procesit të votimit dhe të numërimit të votave.

Bazuar  në të dhënat e mbledhura nga vëzhgimet, KShH, sipas rastit, do të dalë me deklarata ose do të adresojë problemet në institucionet përkatëse dhe në përfundim të procesit zgjedhor do të shprehet mbi ecurinë e zgjedhjeve dhe nivelin e respektimit të standarteve për zgjedhje të lira, të ndershme dhe demokratike.

Në këtë trajnim, u ftuan dhe morën pjesë përfaqësues të misionit të vëzhguesve të OSBE/ODIHR-it që ndodhen në Shqipëri për të monitoruar zgjedhjet vendore 2007.