Projekti:

Prill – Qershor 2005

Qëllimi i këtij projekti ishte informimi më i mirë i publikut dhe ndërgjegjësimi i tyre lidhur me të drejtat e tyre ligjore në procesin zgjedhor si edhe nxitja e strukturave përgjegjëse shtetërore ose politike për të realizuar brenda afateve detyrimet ligjore të përcaktuara në Kodin Zgjedhor me qëllim garantimin e një procesi zgjedhor demokratik, transparent dhe të ndershëm.

Objektivat kryesore të projektit:

• Informimi dhe ndërgjegjësimi i opinionit publik lidhur me të drejtat e tyre në procesin zgjedhor.

• Nxitja e zgjedhësve për të marrë pjesën në procesin e rishikimit të listave paraprake të zgjedhësve dhe listave përfundimtare si dhe për të votuar në mënyrë të lirë, të fshehtë dhe demokratike.

• Informimi i zgjedhësve lidhur me procedurat e rregjistrimit dhe ankimimit, afatet ligjore, detyrimet dhe përgjegjësitë e tyre në procesin zgjedhor. 

• Sensibilizimi mbi detyrimet dhe përgjegjësitë ligjore që burojnë nga dispozitat e Kodit Zgjedhor për të gjitha instancat përgjegjëse shtetërore ose politike duke filluar nga anëtarët e komisioneve zgjedhore, organet e qeverisjes vendore, rektorët e universiteteve, dekanët e fakulteteve si edhe deri tek partitë politike.

 Veprimtaritë e zhvilluara në kuadër të projektit:

• Përgatitja e udhërrëfyesit “Zgjedhësit në procesin zgjedhor” i hartuar në formë pyetje-përgjigjesh, në një gjuhë të thjeshtë dhe të kuptueshme për të gjithë dhe i botuar jo vetëm në shqip, por dhe në greqisht e maqedonisht për t’i ardhur në ndihmë pakicave kombëtare që jetojnë në Shqipëri dhe që do të marrin pjesë në procesin e votimit. Qëllimi i përgatijes së këtij udhërrëfyesi ishte informimi i zgjedhësve lidhur me të drejtat e tyre ligjore në procesin zgjedhor. Ky udhërrëfyes është botuar në 6000 kopje dhe është shpërndarë në të gjithë rrethet e Shqipërisë, në fakultete si edhe në ato krahina ku jetojnë minoritetet greke dhe maqedonase nëpërmjet gazetës Panorama, korrespodentëve dhe aktivistëve të KSHH-së.

• Përgatitja e katër suplementeve informuese të botuar në gazetën Korrieri.
  Suplementi i parë i botuar në 14 Prill 2005 është përqëndruar në garantimin ligjor të së drejtës kushtetuese të zgjedhësve, të drejtës së votës si edhe në përgjegjësinë që kanë personat e ngarkuar me administrimin e zgjedhjeve sipas Kodit Penal. Gjithashtu, në këtë suplement është përfshirë një intervistë e Ministrit të Pushtetit Vendor dhe të Decentralizimit lidhur me hartimin e listave paraprake të zgjedhësve, debatet dhe vështirësitë në hartimin e tyre dhe një intervistë e Kryetarit të Komisionit Qendror të Zgjedhjeve lidhur me shkeljen e afateve ligjore nga ana e partive politike për ngritjen e komisioneve zgjedhore.

Suplementi i dytë i botuar në 21 Prill 2005 i është kushtuar të drejtës së studentëve për të votuar në vendqëndrimet e tyre dhe masat e ndërmarra nga rektorët e universiteteve dhe dekanët e fakulteteve për të garantuar këtë të drejtë. Për këtë qëllim janë kryer intervista të shumta me studentë dhe me rektorë të universiteteve në rrethe të ndryshme të vendit. Në këtë suplement janë pasqyruar të gjitha afatet ligjore të parashikuara në Kodin Zgjedhor si edhe është botuar një deklaratë e KSHH-së lidhur me mosrespektimin e afatit ligjor për shpalljen e listave paraprake të zgjedhësve.

 

Suplementi i tretë i botuar në 18 Maj 2005 fokusohet në faktorët që pengojnë ngritjen në kohën e caktuar nga ligji të komisioneve zgjedhore, pasojat e dëmshme që mund të sjellin vonesa të tilla në realizimin e zgjedhjeve të lira, të ndershme dhe trasparente. Gjithashtu, në këtë suplement trajtohet dhe çështja e krijimit të grupeve të numërimit të votave, detyrat e tyre dhe afati ligjor brenda së cilës duhet të paraqiten propozimet e partive politike për anëtarët e grupeve të numërimit të votave. Për këto çështje janë marrë opinionet e Kryetarit të KQZ-së dhe një përfaqësuesi të Partisë Demokratike.

 

Në suplementin e katërt të botuar në 26 Maj 2005 trajtohet fillimi i fushatës zgjedhore, finacimi i saj me trasparencë, ankimimet në rrugë administrative dhe gjyqësore. Gjithashtu, në një material të veçantë theksohet roli i vëzhguesve në vëzhgimin e procesit zgjedhor, të drejtat dhe detyrat e tyre dhe për këtë qëllim është botuar dhe një deklaratë e KSHH-së lidhur me kufizimin e të drejtës së vëzhgimit të vëzhguesve vendas në përputhje me ndryshimet e bëra Kodit Zgjedhor.

Impakte të projektit:

• Informimi dhe ndërgjegjësimi i opinionit publik lidhur me të drejtat e tyre në procesin zgjedhor.

• Nxitja e zgjedhësve për të marrë pjesë në procesin e korrigjimit të listave paraprake të zgjedhësve dhe listave përfundimtare, në procesin e ankimimit dhe të rregjistrimit në gjykatë si edhe për të marrë pjesë në procesin e votimit.

• Informimi i zgjedhësve lidhur me afatet ligjore brenda të cilave ata mund të ushtrojnë të drejtat e tyre.

• Nëpërmjet aktiviteteve të kryera në kuadër të këtij projekti i është kushtuar një kujdes më i madh pakicave kombëtare në Shqipëri dhe informimit lidhur me të drejtat e tyre në procesin zgjedhor nëpërmjet përgatitjes së udhërrëfyesit “Zgjedhësit në procesin zgjedhor” në gjuhën maqedonase dhe greke.

• Një kujdes i veçantë i është kushtuar informimit të studentëve lidhur me të drejtat e tyre në procesin zgjedhor dhe sidomos mbi procedurat e rregjistrimit në rast se ata duan të votojnë në vendqëndrimet e tyre. 

• Nxitja dhe sensibilizimi i strukturave përgjegjëse shtetërore dhe politike lidhur me detyrimet dhe afatet ligjore që burojnë nga Kodi Zgjedhor të cilat duhen përmbushur për arritjen e zgjedhjeve të lira, të ndershme dhe demokratike.