THIRRJE ZGJEDHËSVE!

LISTAT PARAPRAKE DHE PËRFUNDIMTARE TË ZGJEDHËSVE MUND TË NDRYSHOJNË

02.02.2007

Komiteti Shqiptar i Helsinkit u bën thirrje të gjithë zgjedhësve që për ushtrimin e të drejtës kushtetuese të votës në Zgjedhjet e Organeve të Qeverisjes Vendore që do të zhvillohen në 18 shkurt 2007, të njihen si me listat paraprake që do të vazhdojnë të jenë të shpallura deri në datën 6 shkurt 2007, dhe me ato përfundimtare të zgjedhësve që do të shpallen në datën 7 shkurt 2007.

Është e drejtë e çdo zgjedhësi që kur emrin e tij nuk e gjen në listat paraprake t’i drejtohet me shkrim kryetarit të njësisë të qeverisjes vendore ku ai ka banimin dhe po të jetë nevoja edhe gjykatës në rast se kërkesa e tij nuk merret parasysh.

Nga të dhënat e mbledhura nga vëzhguesit e KShH-së në Tiranë dhe disa rrethe të tjera rezulton se sensibilizimi dhe propaganda zgjedhore për ndërgjegjësimin e zgjedhësve, për hartimin dhe verifikimin e emrave në listë dhe korrigjimin e tyre në raste të nevojshme është relativisht i dobët.

Meqënëse koha për rishikimin e listave është tepër e shkurtër, KShH-ja i bën thirrje gjithë votuesve që të njihen me vendin e shpalljes së listave, me emrat e tyre dhe të familjarëve në lista.

Duke patur parasysh përvojën e zgjedhjeve të mëparshme, KShH u bën gjithashtu thirrje zgjedhësve që të tregojnë interes për t’u njohur edhe me listën përfundimtare të zgjedhësve sepse edhe në këto lista mund të ketë mungesa e pasaktësi. Sipas ligjit në këtë rast zgjedhësi ka të drejtë ti drejtohet gjykatës.

KShH mendon se me një punë intensive dhe të përditshme duke përdorur të gjitha mjetet dhe format sensibilizuese, do të arrihet në përgatitjen e listave ku do të përfshihen të gjithë shtetasit që kanë të drejtën e votës.