Persona të paraburgosur mbahen në kundërshtim me ligjin në dhomat e ndalimit dhe shoqërimit të Policisë

Më datë 27 shkurt 2008, një grup i Komitetit Shqiptar të Helsinkit (KSHH) vëzhgoi situatën e respektimit të të drejtave të njeriut në dhomat e ndalimit dhe të shoqërimit në komisariatin e policisë Vlorë.

Sipas nenit 28, pika 2 të Kushtetutës të Republikës së Shqipërisë, personave që u është hequr liria brenda 48 orëve duhet të dërgohen para një gjyqtari i cili vendos paraburgimin ose lirimin e tij, jo më vonë se 48 orë nga çasti i marrjes së dokumentave për shqyrtim, ndërsa sipas pikës 5 të dispozitës së mësipërme personit që i është hequr liria ka të drejtën e trajtimit njerëzor dhe të respektimit të dinjitetit të tij. Personat e paraburgosur mbahen në vendet e përcaktuara nga ligji si vende paraburgimi.

Gjatë vëzhgimit në  dhomat e ndalimit dhe shoqërimit të komisariatit Vlorës rezultoi se:

1.      Në kundërshtim flagrant dhe në shkelje të dispozitave kushtetuese dhe të kodit të procedurës penale, 7 persona, ndaj të cilëve gjykata kishte caktuar si masë sigurimi arrest me burg, vazhdojnë të mbahen në dhomat e paraburgimit për një periudhë 5 deri në 15 ditë nga dita e arrestimit.

2.      Ndonëse i dënuari Dh. J, i dënuar në mungesë nga Gjykata e Rrethit Gjyqësor Vlorë, duhej dërguar menjëherë në burgun përkatës, ai vazhdon të mbahet në komisariatin e policisë.

3.      Ligji përcakton se arrestimi i personave të moshuar duhet të jetë një rast përjashtimor. Grupi i monitorimit konstatoi se dhomat e ndalimit të këtij komisariati gjendeshin dy të moshuar: H. Sh dhe M. Ç. përkatësisht të moshave 72 dhe 84 vjeç, të  sëmurë dhe që kishin nevojë për trajtim mjekësor të veçantë. Mbajtja e tyre ishte tej afateve të përcaktuara nga ligji dhe në shkelje të rëndë të ligjit.

4.      KSHH-ja konstatoi se gjendja e dhomave të ndalimit dhe të shoqërimit të shtetasve shqiptarë nga policia në këtë komisariat ishte mjaft e rëndë. Në këto dhoma mungonin totalisht pasijet e nevojshme. Ndonëse këto dhoma funksionojnë për mbajtjen në një kohë shumë të shkurtër të personave që shoqërohen dhe ndalohen nga polica, përdorimi i tyre për persona të paraburgosur kishte sjellë mbipopullim, strese dhe pakënaqësi.    

KSHH konstatoi se gjendja e dhomave të shoqërimit dhe të ndalimit nuk krijon  as kushtin më minimal për një shtetas që mund të shoqërohet qoftë edhe për verifikim të zakonshëm nga policia e komisariatit  Vlorë..

KSHH-ja sjell në vëmendje të opinionit publik se vendet e paraburgimit, pjesë e të cilit është edhe paraburgimi i Vlorës është në varësi të Ministrisë së Drejtësisë. Nga kontaktet me personelit e policisë, KSHH-ja u informuan se drejtuesit e institucionit të paraburgimit nuk kanë pranuar marrjen e personave të arrestuar, të paraburgosurve në këtë institucion. Si rrjedhim të drejtat e të paraburgosurve që i garanton ligji Nr. 8328 datë 16.04.1998 “Mbi të drejtat dhe trajtimin e të dënuarve me burgim” si dhe Rregullorja e Ministrisë së Drejtësisë e vitit 2006, “Për organizimin dhe funksionimin e sistemit të paraburgimit” vazhdojnë të cënohen rëndë.

Sa më sipër, Komiteti Shqiptar i Helsinkit e shikon të nevojshme:

1.      Të denoncojë publikisht gjëndjen e rëndë të trajtimit të personave të arrestuar, shkeljen e rëndë të ligjit lidhur me funksionet e dhomave të shoqërimit dhe të ndalimit.

2.      KSHH-ja kërkon nga Drejtoria e Përgjithshme e Burgjeve që të urdhërojë drejtuesit e paraburgimit të Vlorës të mos refuzojnë pranimin e të arrestuarve me vendim gjykate dhe të marrin masa për të  bërë urgjentisht transferimin e personave të paraburgosur për në dhomat e paraburgimit.

3.      KSHH-ja i sugjeron Ministrit të Drejtësisë që të udhëzojë zbatimin rigoroz të nenit 75 të ligjit 8328 datë 16.04.1998, dispozitat e të cilit shtrihen edhe ndaj të arrestuarve dhe të ndaluarve.

4.      KSHH-ja i sugjeron Ministrit të Drejtësisë që të marrë masa që situata të tilla të mos përsëriten në të ardhmen në këtë komisariat apo në komisariate të tjera.  

5.      KSHH-ja i bën thirrje Drejtorisë së Përgjithshme të Policisë së Shtetit të marrë masa për të garantuar kushtet mininale fizike të nevojshme të mbajtjes së personave të ndaluar dhe të shoqëruar në mjediset e këtij komisariati.