Një sulm i turpshëm dhe tendencioz ndaj veprimtarit të të drejtave të njeriut dhe mbrojtësit të parimeve të shtetit ligjor në Shqipëri

Në një nga gazetat e përditshme, prej disa ditësh po sulmohet në mënyrë tendencioze një nga veprimtarët e të drejtave të njeriut dhe mbrojtësit e parimeve të shtetit ligjor në Shqipëri, z. Niazi Jaho.

Informacionet që serviren janë të pavërteta, shtrembërim i realitetit dhe akuza të qëllimshme.

Z. Jaho është anëtar i Komitetit Shqiptar të Helsinkit prej vitit 1995. Jurist në profesion, ai ka patur dhe ka kurajon civile të mbrojë liritë dhe të drejtat e njeriut, është studiues dhe kritik i legjislacionit shqiptar dhe çështjeve të kushtetushmërisë në Shqipëri.

Në vitin 1956, Z. Njazi Jaho u dënua për veprimtari “armiqësore dhe antiparti” në Konferencën e Tiranës dhe u dërgua në Elbasan me detyrë ndihmësprokuror. Edhe pse në këtë detyrë, ai ishte nën kontroll dhe i besohej në mënyrë të rezervuar.  

Në vitin 1974, si person “antiparti” u dërgua në kooperativën e Pajovës dhe më pas në atë të Gjoçaj në Peqin ku ka qëndruar deri në vitin 1983, vit në të cilin doli në pension.

Sipas vendimit të Këshillit të Ministrave të asaj kohe për shkak të veprimtarisë “armiqësore antiparti” iu caktua pension minimal. Pas vitit 1983 deri në vitin 1999 iu refuzua kërkesa për leje banimi në qytetin e Tiranës, edhe ku edhe banonte.

Në periudhën që artikull shkruesi bën fjalë për proceset e Spaçit dhe të Burrelit, Z. Jaho ka qënë punëtor në kooperativë bujqësore në rrethin e Elbasanit dhe s’mund të ishte personi që ka dënuar pjesëmarrësit e revoltës.

Për Komitetin Shqiptar të Helsinkit, sulmet ndaj këtij personaliteti në fushën e drejtësisë dhe të mbrojtjes së të drejtave të njeriut, bëhen për shkak të angazhimit të tij publik në mbrojtje të lirive dhe të drejtave të njeriut, për shkak të kurajos civile që tregon në diskutimin e çështjeve me karakter ligjor dhe kushtetues.  Ato janë në vazhdën e telefonatave provokuese dhe kërcënuese që i bëhen z. Jaho nga persona anonim prej disa kohësh.

Për Komitetin Shqiptar të Helsinkit është e qartë se segmenteve të caktuara të politikës dhe ndonjë media nuk i pëlqen fjala e lirë dhe trajtimi profesional i çështjeve ligjore dhe kushtetuese.

Për merita të veçanta civile, studiues dhe intelektual i spikatur i jurisprudencës, mbrojtës i përkushtuar i vlerave dhe parimeve bazë të Kushtetutës së RSH-së z. Jaho është dekoruar në vitin 2006 nga ish- President i Republikës së Shqipërisë.  

Në vitin 2008, z. Bamir Topi, President i Republikës i jep z. Jaho urdhërin “Mjeshtër i madh” me motivacionin “Për merita të shquara shkencore dhe profesionale për ndërtimin dhe konsolidimin e shtetit ligjor demokratik dhe rolin aktiv në mbrojtje të të drejtave të njeriut”

Dekorimi i tij nga Presidenti i Republikës është një vlerësim i këtij institucioni për fjalën e lirë, për mbrojtjen e kushtetutës dhe forcimin e shtetit ligjor në Shqipëri.

Presidenti i Republikës së Shqipërisë ka vlerësuar individin për kontributin e tij në shoqëri dhe jo nga përkatësia partiake apo bindjet politike.