Komiteti Shqiptar i Helsinkit  monitoron pjesëmarrjen e minoriteteve në vendimarrjen vendore

04.03.2008

Në kuadër të kontribuimit të tij për një respektim më të mirë të të drejtave të minoriteteve dhe komuniteteve në nivel vendor dhe rritjen e pjesëmarrjes së tyre në  vendimarrjen vendore, Komiteti Shqiptar i Helsinkit (KSHH) realizoi një anketim të qytetarëve, të punonjësve të administratës dhe anëtarëve të Këshillit Bashkiak, Elbasan lidhur me aksesin e përfaqësuesve të minoriteteve në shërbimet që ofron Bashkia.

Në përfundim të anketimit të qytetarëve dhe të vetvlerësimit të Bashkisë Elbasan rezultoi se:

Në përgjithësi, në bashkinë e Elbasanit ekziston një bashkëjetesë paqësore dhe tolerancë mes minoriteteve dhe komuniteteve që banojnë në të. Megjithatë, sipas tyre ka shfaqje të diskriminimit të minoritetit Rom. Ndjeshmëria e qytetarëve për këtë problem është e lartë.

Megjithë vlerësimin pozitiv të qytetarëve, Bashkia e Elbasanit nuk ka arritur ende të gëzojë nivel të kënaqshëm të besimit të qytetarëve në lidhje me garantimin e mbrojtjes së të drejtave të pakicave dhe komuniteteve që banojnë nën juridiksionin e kësaj Bashkie.

Qytetarët dhe punonjësit e Bashkisë kanë pak njohuri në lidhje me trajtimin e çështjeve të minoriteteve në përgjithësi dhe për rolin që duhet të luajë Bashkia e organet e tjera për respektimin e të drejtave të pakicave.  Nga studimi del se shumë keqkuptime rreth pozitës së minoriteteve dhe të drejtave të tyre janë rezultat i mungesës së informacionit.

Shqetësuese perceptohet gjendja e pakicave dhe komuniteteve në lidhje me punësimin, arsimin, pjesëmarrjen në vendimmarrje, strehimin, dhe shëndetësinë e kujdesin për grupe të veçanta të shoqërisë. Në këtë kuadër, të anketuari rekomandojnë marrjen e masave shumëplanëshe në nivel vendor në këto drejtime. 

Arsimi vlerësohet si një nga drejtimet në të cilën duhen marrë masa, edhe pse disa prej të anketuarve mendojnë që parimi i barazisë duhet të jetë parësor në shoqëri. Kjo paqëndrueshmëri në qëndrime, nxjerr në pah nevojën e informimit dhe trajnimit të administratës publike lidhur me të drejtat që gëzojnë pakicat në një shoqëri.

Punësimi, strehimi dhe arsimi përbëjnë fushat ku duhet të bëhet një kujdes i veçantë nga ana e Bashkisë së Elbasanit. Pavarësisht rezultateve pozitive të evidentuara përgjatë studimit, një nga prioritetet e organeve të qeverisjes vendore duhet të jetë shmangja e fenomeneve diskriminuese ndaj minoriteteve sidomos ndaj atij rom dhe komunitetit egjiptian. Të anketuarit rekomandojnë marrjen e masave të tilla si: informimi, masa me karakter social ose hartimi i një legjislacioni specifik kundër diskriminimit.

Qytetarët e anketuar vlerësojnë marrjen e masave mbi bazën e gjendjes reale të pakicave.

Qytetarët kërkojnë që të gjenden forma sa më të shpejta dhe efikase në shkëmbimin e informacionit ndërmjet bashkisë dhe komuniteteve në bashkinë e Elbasanit.

Për përmirësimin e përfaqësimit në nivel vendor, të anketuarit vlerësojnë nevojën e përmirësimit të politikave të veçanta të punësimit dhe arsimimit për minoritetet, krijimin e sektorëve të veçantë për çështjet e minoriteteve, ngritjen e komiteteve këshillues me anëtarë të minoriteteve në përbërje.

Masat pozitive shihen si një nevojë për t’u mundësuar minoriteteve gëzimin në nivele të kënaqshme të të drejtave ekonomike, sociale, arsimore dhe përfaqësimin realisht të tyre në organet e pushtetit vendor. Përfaqësimi me rezervime vendesh në Këshillin Bashkiak pranohet gjerësisht si një tjetër mekanizëm që do të mund të përmirësojë përfaqësimin e minoriteteve.

Nisur nga misioni i organeve të qeverisjes vendore për të siguruar qeverisje në një nivel sa më afër shtetasve është e nevojshme që Bashkia Elbasan të shtojë kontaktet me qytetarët.

Të anketuarit vlerësojnë median e shkruar dhe elektronik si faktor të rëndësishëm në funksion të bashkëjetesës sociale. Sipas tyre, media duhet të jetë më e vëmendshme ndaj shkeljes së të drejtave të minoriteteve si dhe rritjen e kontakteve të saj me minoritetet që banojnë në bashkinë e Elbasanit.