Në datën 24 Janar 2008, KSHH së bashku me ekspertin e tija Z. Jan van den Brand, njohën drejtuesit e lartë te burgjeve me një instrument efektiv për matjen e klimës dhe trajtimin e të dënuarve me dinjitet dhe humanizëm. Në këtë trajnim u trajtua edhe roli i drejtuesve të lartë të institucioneve penitenciare në trajtimin e të dënuarve të cënueshëm. Instrumenti i auditit evidenton perceptimet e vetë të dënuarve dhe personelit në institucione lidhur me një sërë çështjesh të rëndësishme dhe cilësinë e shërbimeve në institucione. Ky instrument krijon hapësira për institucionet penitenciare dhe DPB-në për të bërë analiza të situatës aktuale në institucione dhe si mund të përmirësohet ajo. E fundit po jo më pak e rëndësishme, ky instrument ofron një qasje te të standardizuar, objektive dhe gjithëpërfshirëse. KSHH-ja rekomandon që ky instrument të përdoret në disa institucione pilot.

Në datat 1-3 Prill 2008 KSHH-ja organizoi një trajnim me gjithë drejtuesit e institucioneve penitenciare në vendin tonë. Ekspertët me përvojë në fushën penitenciare Z. Jan van den Brand dhe Z. Jacques van Huet, dhanë kontributin e tyre të vyer në këtë veprimtari. KSHH kishte nderin të ftonte në këtë trajnim Znj. Mirjam Dierckxsens, një nga trajnerët e larta të Sistemit të Burgjeve Holandeze, e cila ka trajnuar të gjithë drejtorët e përgjithshëm dhe drejtorët lokalë në Holandë.

Trajnimi u përqendrua në disa çështje me rëndësi lidhur me planifikimin dhe delegimin; dhënia e duhur e informacionit dhe reagimit; marrja e vendimeve; planifikimi i veprimtarive dhe lidhja midis tyre, përcaktimi dhe alokimi i burimeve etj.

Të gjithë pjesëmarrësit u pajisën me një dosje të plotë me gjithë materialet trajnuese. Pjesëmarrësit vlerësuan maksimalisht cilësinë e trajnimit dhe e konsideruan atë si shumë të vlefshëm dhe praktik për punën e tyre të përditshme.