Në datat 4-6 Shkurt 2008 Komiteti Shqiptar i Helsinkit (KShH) organizoi një sesion pune për hartimin e programeve të QTB-së për trajnimin fillestar të punonjësve të rolit bazë të sapo përzgjedhur. Është e rëndësishme të nënvijëzohet që shumë shpejt do të fillojë funksionimi i tre institucioneve penitenciare të reja, të cilat do të kenë nevojë për punonjës të trajnuar. Në këtë kontekst, ky sesion pune kishte si qëllim kryesor  dhënien e kontributit dhe ndihmës konkrete për grupin e punës për hartimin  e programit 22 ditor të trajnimit për punonjësit e rolit bazë të sapo përzgjedhur në sistemin penitenciar.

Grupi shqiptar i punës u ndihmua në mënyrë të vazhdueshme nga ekspertët ndërkombëtarë me shumë eksperiencë në këtë fushë si Znj. Jet Hilverdink, Trajnere e Lartë në Qendrën e Trajnimit të Burgjeve Holandeze dhe Z. Jan van den Brand, ekspert në fushën penitenciare të Agjencisë Holandeze të Institucioneve të Korrektimit. Znj. Edlira Papavangjeli, Menaxhere e Programit moderoi këtë sesion.

Grupi shqiptar i punës u njoh në detaje me metodologjinë e hartimit të programeve bazë, veçanërisht me mënyrën e hartimit të moduleve të trajnimit, udhëzuesve për trajnerët, planet e punës si edhe librat e punës për studentët/punonjësit  që do të trajnohen. Në fund të këtij sesioni pune pjesëmarrësit e grupit të punës ndërmorën angazhimin konkret për të punuar në katër grupe pune së bashku për hartimin e manualit, librave të punës dhe planeve të punës për trajnerët që do të japin trajnimet.

Grupet e punës po vazhdojnë të punojnë për të përmirësuar dhe përfunduar versionin paraprak të këtyre materialeve.