Fjala e lirë nuk mposhtet me dhunë

14.03.2008

Komiteti Shqiptar i Helsinkit (KSHH) shpreh indinjatën e tij për dhunën e ushtruar më 10 Mars të këtij viti, nga deputeti Tom Doshi ndaj gazetarit Besar Likneta që punon për agjensinë rajonale BIRN (Balkan Investigative Reporting Network).

KSHH e shikon të nevojshme të reagojë publikisht jo vetëm sepse veprime të tilla janë ligjërisht të dënueshme, por edhe për faktin sepse ato cënojnë lirinë e shtypit e drejtë kjo e sanksionuar në Kushtetutën tonë.

KSHH e dënon këtë akt gjithashtu edhe për faktin se ai u krye nga një deputet që ka për detyrë jo vetëm të respektojë funksionin e gazetarit por edhe të mbrojë fjalën e lirë.

Për KSHH-në edhe motivi i ushtrimit të dhunës ndaj gazetarit Besar Likneta është i dobët. Z. Doshi zgjodhi mënyrën më brutale për t’ju përgjigjur kritikës publike duke mos përfillur kështu të drejtën e medias që të informohet dhe të informojë, të investigojë dhe të denoncojë.

Akti i dhunës ndaj gazetarit në një vënd publik shpreh në të njëjtën kohë edhe konceptin e gabuar dhe të papranueshëm se personi me imunitet mund të kryejë pa u ndëshkuar edhe veprime arbitrare gjë që vjen në kundërshtim me parimin kushtetues se para ligjit janë të gjithë të barabartë.

Funksionarët e shtetit, politikanët dhe deputetët duhet të jenë veçanërisht të vemëndshëm ndaj kritikave të medias edhe në rastet kur ato mund të jenë të ashpra.

Të emëruar apo të zgjedhur në këto funksione ata janë të detyruar të zbatojnë me rigorozitet ligjin, të ruajnë pastërtinë e figurës së tyre morale, të mos kritikojnë dhe të mos pranojnë priviligje abuzive dhe të kundërligjshme.

Media ka njoftuar se deputeti Doshi për aktin e kryer ka kërkuar falje. Megjithëse ky është një gjest elementar reflektimi, KSHH mendon se organet kompetente do të duhej të hetonin me shpejtësi dhe objektivitet kushtet, rrethanat dhe motivet që çuan deri në ushtrimin e dhunës ndaj gazetarit që kryente detyrën e tij publike dhe profesionale.