Tragjedi me pasoja tepër të rënda

16.03.2008

Dje në datën 15 Mars 2008, shpërthimi i fuqishëm i municioneve në fshatin Gërdec të Bashkisë Vorë, shkaktoi disa viktima, qindra të plagosur dhe dëme të jashtëzakonshme materiale.

Komiteti Shqiptar i Helsinkit (KShH) bashkohet me dhimbjen e madhe dhe të pazëvëndësueshme të familjarëve të viktimave dhe u shpreh atyre ngushëllimet e tija me të sinqerta.

KSHH-ja dëshiron dhe uron gjithashtu shërimin e shpejtë të të gjithë të plagosurve dhe kthimin e tyre në gjirin e familjes.

Në këto momente të vështira, kryesorja është marrja e masave urgjente, efikase dhe të koordinuara për të reduktuar në maksimumin e mundshëm traumën shpirtërore të mijëra njerëzve si dhe dëmet e pallogaritshme që ata kanë pësuar.

KShH ka ndjekur me shqetësim dhe vemendje transmetimet e vazhdueshme të medias elektronike dhe vlerëson në mënyrë të veçantë kontributin e saj. KShH-ja vlerëson angazhimin e personelit mjekësor dhe të policisë dhe të ushtrisë, solidariteti e treguar nga shtetasit shqiptarë brenda dhe jashtë  vendit. 

Sot, përfaqësues të këtij Komiteti u takuan me persona të plagosur të shtruar në spitale si dhe shumë familjarë dhe të afërm të tyre. Pasojat tragjike që kishin pësuar, traumat që kishin përjetuar në momentet e kësaj tragjedie, pamjet tronditëse nga vendi i ngjarjes, vënia në rrezik e jetës dhe pasurisë së shumë njerëzve kërkojnë jo vetëm reflektim, por edhe një analizë të thelluar dhe kritike nga ana e Qeverisë Shqiptare dhe organet përkatëse të saj për të arritur në konkluzione të drejta për shkaqet e kësaj katastrofe dhe përse ajo nuk u parandalua?!

KShH është në dijeni se organet kompetente kanë filluar çështjen penale. Në këto kushte, KShH nuk paragjykon përgjegjësinë e askujt, por si një organizatë joqeveritare në mbrojtje të të drejtave të shtetasve, ndër të cilat e drejta për jetën është themelore, i bën thirrje Qeverisë Shqiptare dhe organeve të specializuara që shkaqet e kësaj tragjedie të sqarohen sa më shpejt, me objektivitet dhe transparencë për opinionin publik.

Për KShH-në nuk mund të lihen jashtë vëmëndjes faktet dhe të dhënat që kanë të bëjnë me ngjarjen. Disa nga të intervistuarit e kontaktuar sot nga KSHH-ja shprehën  indinjatën e thellë për vendosjen e  armatimit dhe të fabrikës së ç’montimit të tij në një zonë të populluar. Disa nga punonjësit e kësaj fabrike u shprehën se ishin të patrajnuar, punonjës pa përvojë, punonin në të zezë për shkak të kushteve të rënda ekonomike.  Nga takimet me ta  mësuam se në punë, në fundjave punonin edhe të mitur dhe gra që nuk njihnin as rregullat elementare të sigurimit.

Për KShH-në, pavarësisht nga fakti se punonjësit mund të jenë të punësuar në sektorë shtetërore apo privatë, është shteti ai që duhet të garantojë jetën dhe shëndetin e tyre sepse ligjet dhe aktet nënligjore të mbrojtjes dhe të sigurimit në punë janë të detyrueshme për të gjithë dhe kërkojnë kontroll të vazhdueshëm mbi zbatimin e tyre.

KShH konstaton se autoritetet shtetërore vihen në lëvizje vetëm pasi ndodhin aksidente ose tragjedi të rënda duke nënvlerësuar kështu masat paraprake të sigurimit në punë. Ngjarja e Dhëmblanit apo e ndonjë incidenti tjetër ishin sinjale që duhet të vlerësoheshin nga autoritetet përkatëse.

KShH sugjeron që papolitizuar problemin është urgjente të përcaktohen masat e domosdoshme që ç’montimi dhe asgjesimi i armatimit të shumtë që ndodhet në vendin tonë të mos përbejë më rrezik për jetën dhe shëndetin e njerëzve.